قازاقستاندىق سپورتشى الەم چەمپيوناتىنان بۇيىرعان جالعىز مەدالدى باپكەرىنە سىيلادى

اتىراۋ. قازاقپارات - حورۆاتيا استاناسى زاگرەبتە وتكەن كۇرەس تۇرلەرىنەن جاس وسپىرىمدەر اراسىنداعى الەم چەمپيوناتىنىڭ قولا جۇلدەگەرى بەكزات جالعاسوۆتى سپورت جاناشىرلارى مەن تۋعان-تۋىستارى اتىراۋ اۋەجايىنان سالتاناتتى تۇردە كۇتىپ الدى، دەپ حابارلايدى قازاقپارات ءتىلشىسى.

الەمدىك دودادا ەركىن كۇرەستەن قازاق بالۋاندارى جالعىز عانا مەدالدى ەنشىلەدى. بۇل جۇلدەنىڭ يەسى اتىراۋلىق بەكزات بولدى.

«الدىمەن، مەنىڭ ەش قيىندىقسىز دايىندالىپ، جارىستارعا بارۋىما مۇمكىندىك جاساعان وبلىستىق سپورت باسقارماسىنا العىسىمدى بىلدىرەمىن. حورۆاتيا ەلىنە كىل مىقتى بالۋاندار جينالعان. ۇزدىك ۇشتىكتەن كورىنۋدىڭ ءوزى قيىنعا سوقتى. دەگەنمەن ۇزاق ۋاقىت تىنىمسىز دايىندىقتىڭ جەمىسىن كوردىم»، - دەدى ول.

ايتا كەتەرلىگى، بەكزات جالعاسوۆ الەمدىك دودادا جەڭىپ العان مەدالىن باپكەرى اسلان جامانبايەۆتىڭ موينىنا تاقتى. وسىلايشا جاتتىقتىرۋشىسىنا دەگەن العىسىن ءبىلدىردى.

جاس سپورتشى بۇل جەتىستىگىمەن توقتاپ قالار ەمەس. ول ەندى وليمپيادا ويىندارىنا قاتىسىپ، ەلىمىزدىڭ ءانۇرانىن شىرقاتۋدى ماقسات ەتىپ وتىر.

حورۆاتيانىڭ زاگرەب قالاسىندا وتكەن كۇرەس تۇرلەرىنەن كادەتتتەر اراسىنداعى الەم بىرىنشىلىگىندە قازاقستاندىقتارعا جالعىز مەدال بۇيىرعانى تۋرالى بۇعان دەيىن جازعان بولاتىنبىز.

جارىستى ءبىرىنشى بولىپ، ەركىن كۇرەس بالۋاندارى اشتى. اتالعان كۇرەس تۇرىنەن 65 كەلى سالماقتا سىنعا تۇسكەن بەكزات جالعاسوۆ الدىمەن ماكەدونيالىق بالۋانمەن كۇرەسىپ، ونى 10:0 ەسەبىمەن جەڭدى. شيرەك فينالدا ۋكراينالىق بالۋاندى 10:3 ەسەبىمەن تىزە بۇكتىردى. وكىنىشكە قاراي، فينالعا شىعار جولدا بەكزات رەسەيلىك ينالبەك شەريەۆتەن 2:10 ەسەبىمەن ۇتىلىپ قالدى. ال قولا مەدال ءۇشىن بولعان بەلدەسۋدە گرۋزيادان كەلگەن بالۋاننىڭ مىسىن باسىپ (8:2) الەم چەمپيوناتىنىڭ قولا جۇلدەگەرى اتاندى.

اۆتور: اباي ابىلاي ۇلى