قازاقستان حالقى اقمولانىڭ ەلوردا اتانعانىن قالاي ەستىدى
بۇگىنگىدەي اقپاراتتىق تەحنولوگيالار قارقىندى دامي قويماعان زاماندا رەسپۋبليكا حالقى ەل ورداسىنىڭ الاتاۋ باۋرايىنداعى الماتىدان سارىارقا تورىندەگى اقمولاعا اۋىسقانىن قازاقپارات تىلشىسىنە سول كەزدە «قازاقستان» تەلەراديو كورپوراتسياسىنىڭ ءبىرىنشى ۆيتسە-پرەزيدەنتى بولعان ساۋىتبەك ابدراحمانوۆ ايتىپ بەردى.
«1997 -جىلدىڭ جاز ايىندا الماتىدان اقمولاعا العاشقى جۋرناليست رەتىندە كەلدىم دەسەم ارتىق ايتقاندىق ەمەس. نەگە ولاي كەسىپ ايتامىن؟ ويتكەنى، جاز ايىندا «قازاقستان» تەلەراديو كورپوراتسياسىنىڭ ءبىرىنشى ۆيتسە-پرەزيدەنتى رەتىندە سارى ارقا تورىنە ۇزاق مەرزىمدىك ءىس- ساپارعا جىبەرىلگەن ەدىم. «كەمىندە 3 اي بولاتىن شىعارسىز» دەپ تە ەسكەرتكەنى ەسىمدە. سول كەزدە الدىما قويىلعان مىندەت اقمولادان «اقشام» اقپاراتتىق باعدارلاماسىنىڭ شىعۋىن قامتاماسىز ەتۋ، ماتەريالدىق-تەحنيكالىق بازاسىن جاساۋ، كادرلاردى دايىنداۋ بولدى. ول مىندەت ءوز ۋاقىتىندا دەر ورىندالدى. اقمولاعا مەملەكەتتىك رامىزدەرىمىز جەتكىزىلگەن كۇنى كەشكى ساعات 20-00-دە «اقشامنىڭ» اقمولادان بەرىلۋى قامتاماسىز ەتىلدى»، - دەپ ەسكە الادى ساۋىتبەك ابدراحمانوۆ.
بۇگىندە ءماجىلىس دەپۋتاتى ساۋىتبەك اعا وسى رەتتە باسىنان وتكەن سول ءبىر كۇندەردەگى قىزىقتى وقيعامەن ءبولىستى.
«ءبىز ەكى قالا اكىمىنىڭ تەلەكوپىرىن ويلاستىردىق. «باسقا پالە تىلدەن» دەمەكشى، يدەيانىڭ اۆتورى رەتىندە بۇل جۇمىس ماعان تاپسىرىلدى. تەلەكوپىرگە الماتى قالاسىنىڭ اكىمى كەلىسىمىن بەرگەنىمەن، اقمولا وبلىسىنىڭ اكىمى باس تارتتى. وسى ورايدا «وبلىس اكىمىنىڭ قاتىسى قانشا، قالا اكىمى قايدا؟» دەگەن ساۋالدىڭ كەسە-كولدەنەڭ الدان شىعارى ايتپاسا دا تۇسىنىكتى. ماسەلە مىنادا، اقمولا ول كەزدە وبلىسقا باعىنىشتى قالا، ياعني وبلىس اكىمى باسقارادى. وڭىرگە باسشىلىق جاساپ وتىرعان جانىبەك كارىبجانوۆ ءوزىنىڭ قاتىسا المايتىندىعىن، ورنىنا ورىنباسارى سۆەتلانا جالماعانبەتوۆا بولاتىندىعىن ەسكەرتتى. شىنىن ايتقاندا، وعان ءبىزدىڭ كوڭىلىمىز ءتۇستى.
«الماتىدان قالا اكىمى، ال مىنا جاقتان وبلىس اكىمىنىڭ ورىنباسارى شىقسا، قالاي بولماق» دەپ ويلاندىق. ول كەزدە وبلىس، قالا باسشىلارى ورتالىق ورگانمەن كەلىسىپ بارىپ سويلەيتىن»، - دەدى ول.
وسىنداي اۋرە-سارساڭمەن جۇرگەندە تەلەكوپىر وتەدى دەپ بەلگىلەنگەن كۇن دە كەلىپ جەتەدى.
«تەلەكوپىر وتەتىن كۇنى وبلىس اكىمدىگىنىڭ باسپا ءسوز قىزمەتىنەن 2 ساعاتتان كەيىن ءوڭىر باسشىسىنىڭ ءوزى باراتىندىعى تۋرالى حابار جەتتى. «اياق استىنان مۇنداي وزگەرىس نەگە ورىن الدى ەكەن» دەپ تاڭ قالدىق. وسى ارالىقتا بىزگە دە حابار جەتتى. سويتسەك، 2 ساعاتتاي ۋاقىت بۇرىن عانا پرەزيدەنت اقمولا قالاسىن قازاقستان رەسپۋبليكاسىنىڭ رەسمي استاناسى ەتىپ جاريالاۋ جونىندەگى جارلىققا قول قويىپتى. ال جانىبەك ءسالىم ۇلى سوعان دەيىن «ماسەلە شەشىلگەن ەمەس، مەن نە دەپ ايتامىن» دەپ ەكى ويلى بولىپ تۇرعان ەكەن. فاكسپەن پرەزيدەنت جارلىعى كەلگەن كەزدە عانا جانىبەك ءسالىم ۇلى ءوزى بارۋعا شەشىم قابىلداعان. تەلەكوپىر ءوتىپ، ونىڭ اسەرى وتە جوعارى بولدى. ويتكەنى، كەشكە ساعات 20:00 دەگى سوڭعى جاڭالىق بەرىلمەگەن. بۇگىنگىدەي حابار تەز تارايتىن الەۋمەتتىك جەلىلەر جوق. وسىلايشا، حالىق اقمولا قالاسىنىڭ استانا بولىپ جاريالانعانىن اقپاراتتىق حاباردان بۇرىن تەلەكوپىردەن ەستىدى»، - دەدى ساۋىتبەك ابدراحمانوۆ.
ساۋىتبەك ابدراحمان ۇلى «قازاقستان» تەلەارناسىنا باسشىلىق قىزمەتكە كەلگەنگە دەيىن ورتالىق كوميتەتتە، پرەزيدەنت اپپاراتىندا جۇمىس ىستەگەن. سوندىقتان تىلشىلەر اراسىندا «ابدراحمانوۆ 20 قازاندا جارلىققا قول قويىلاتىنىن ءبىلىپ، تەلەكوپىردى سول كۇنگە قويعان ەكەن» دەگەن اڭگىمە تاراپ كەتەدى.
«شىنىمەن بىلگەنىم جوق، ءساتى سولاي كەلدى. جالپى ەلدىڭ ەلدىگى، مەملەكەتتىڭ باستاۋى تۋرالى ايتقان كەزدە كوبىنە كونستيتۋتسيانى، ءانۇراندى، ەلتاڭبانى الدىمەن اتايمىز. نەگىزىندە ءبىزدىڭ ەلدىگىمىزدى ەسەلەندىرگەن، ايقىنداعان سيپاتتاردىڭ ەڭ باستىسى - ول استانانى ءوزىمىزدىڭ تاڭداۋىمىز، ورناتۋىمىز. ويتكەنى، ەل بولعاننان كەيىن ونىڭ كونستيتۋتسياسى، ەلتاڭباسى، ءانۇرانى، تۋى بولۋعا ءتيىس. تاۋەلسىز ەل بولعاننان كەيىن ول ەلدىڭ حالىقارالىق ۇيىمدارعا مۇشە بولۋى دا زاڭدى. ال ەل بولعاننان كەيىن ورداڭدى ءوزىڭ قاي جەردە تىگەتىنىڭدى ايقىنداۋ - تاۋەلسىزدىكتىڭ ەڭ باستى كورىنىسى. ارقاعا اۋىپ كەلىپ، التىن قازىق قاعۋدا، قازاق جەرىنىڭ قاق ورتاسى كيەلى سارىارقاعا كەلىپ وردا تىگۋدە ەلباسىمىزدىڭ ەرەن ەڭبەگى جاتىر»، - دەپ تۇيىندەدى ءسوزىن ساۋىتبەك ابدراحمانوۆ.
