استانا حالىقارالىق قارجى ورتالىعى تۋرالى شەتەلدىك ساراپشىلار نە دەيدى

استانا. قازاقپارات - بۇگىن ەلباسى ن. نازاربايەۆتىڭ قاتىسۋىمەن اشىلعان «استانا» حالىقارالىق قارجى ورتالىعىنىڭ قىزمەتى مەن بولاشاعىنا قاتىستى شەتەلدىك ساراپشى ماماندار ءوز وي- پىكىرلەرىمەن ءبولىستى، دەپ حابارلايدى قازاقپارات ءتىلشىسى.

«استانا» ح ق و تابىستى ەكونوميكا قۇرۋعا ۇلكەن سەپتىگىن تيگىزەدى» دەپ ەسەپتەيدى ۇلىبريتانيانىڭ ساۋدا ءمينيسترى لورد فرەنسيس مود.

 «مەن «استانا» ح ق و اشۋ يدەياسىن قولدايمىن. مۇنداي قارجى ورتالىعىنىڭ الەۋەتى وتە زور. جاھاندىق ەكونوميكانىڭ گەوگرافياسى قازىر شىعىسقا قاراي ويىسۋدا. ال قىتايمەن شەكتەسىپ جاتقان قازاقستان، قۇرلىقتىڭ ىشىنە، ورتا شىعىس، رەسەي ايماعىنا ەركىن شىعا الادى. ەكونوميكالىق رەفورمالاۋ باعىتىنداعى جۇمىستار جالعاسىن تاپسا «استانا» ح ق و تابىستى ەكونوميكا قۇرۋعا ۇلكەن سەپتىگىن تيگىزبەك»، - دەيدى ول.

 ساراپشى «استانا» ح ق و جۇمىسىن دامىتۋعا قاتىستى ءبىرقاتار كەڭەستەرىمەن ءبولىستى.

«كەيدە ادامدار جاڭا قارجى ورتالىقتارىنا سەنبەي جاتادى. الايدا بۇل جۇمىستاردى ستراتەگيالىق تۇرعىدان دۇرىس جۇرگىزسە - مۇنداي ورتالىقتار وتە پايدالى. مەنىڭ ويىمشا سىزدەرگە ەڭ الدىمەن جەكەشەلەندىرۋ باعدارلاماسىن ءتيىمدى جۇزەگە اسىرۋ قاجەت. بۇل - ەڭ شەشۋشى جۇمىس»، - دەيدى لورد فرەنسيس مود.

جاڭا اشىلعان ورتالىق قىزمەتىنە فينليانديالىق كومپانيالار دا ۇلكەن قىزىعۋشىلىقپەن قارايدى.

«استانا» ح ق و اشىلۋ راسىمىنە قاتىسقان فينليانديالىق «Tracegrow»  كومپانياسىنىڭ باس اتقارۋشى ديرەكتورى تاتۋ ليپپانەن وسىلاي دەيدى.

«استانا - فينليانديا ءۇشىن الەۋەتتى بيزنەس حاب. بۇعان ءبىزدىڭ كوزىمىز جەتتى. ارينە، قىزىعۋشىلىعىمىز وتە جوعارى. جالپى قازاقستاندا مۇمكىندىكتەر كوپ. سىزدەردە ءبىلىمدى ماماندار، جاقسى بيزنەس جۇيەسى بار. بۇل فين كومپانيالارى ءۇشىن وتە ماڭىزدى. ولار استانا ارقىلى تۇتاس ورتا ازيا وڭىرىنە شىعا الادى»، - دەيدى تاتۋ ليپپانەن.

ونىڭ ايتۋىنشا «استانا» ح ق و- نىڭ وڭىرلىك حابقا اينالۋ مۇمكىندىگى وتە جوعارى.

«مەن الەمنىڭ ءىرى قالالارىندا 7 جىل تۇردىم. جانە سىزدەردىڭ استانادا ىستەگەن جۇمىستارىڭىز مەنى قاتتى تاڭعالدىردى. بۇل قالا شەتەلدىك ينۆەستيتسيانى بارشا قازاقستانعا تارتۋ مۇمكىندىگىن قالىپتاستىرادى»، - دەپ پىكىر ءبىلدىردى تاتۋ ليپپانەن.

 سونىمەن قاتار «دارەم» يسلام ەكونوميكاسى جانە قارجى ورتالىعىنىڭ ديرەكتورى مەحمەت اسۋتاي «استانا» ح ق و - قازاقستان ەكونوميكاسىنا يسلام قارجىسىن كوپتەپ تارتۋعا مۇمكىندىك بەرەدى دەپ ەسەپتەيدى.

«قازاقستان دامۋشى مەملەكەت، وعان ەكونوميكالىق ءوسىم كەرەك. قارجى اعىنى اسا قاجەت. «استانا» ح ق و - سول قارجىنى ەلگە تارتا الاتىن ورتالىققا اينالادى»، - دەيدى مەحمەت اسۋتاي.

 ونىڭ ايتۋىنشا، بۇگىنگى تاڭدا يسلام قارجىسىنا دەگەن سۇرانىس الەمدە وتە جوعارى. ال استانا ءوز وڭىرىندە ماڭىزدى ورتالىق. سوندىقتان قازاقستان ءۇشىن يسلامدىق قارجىنىڭ وڭىرلىك حابىنا اينالۋ - بۇل وتە ماڭىزدى ساياسي شەشىم.

«ەندىگى ماسەلە سىزدەرگە بيزنەس مەكتەپتەردى جانە قارجى سالاسىنداعى زەرتتەۋلەردى دامىتۋ قاجەت. ويتكەنى قازاقستان - جاس مەملەكەت. حالقى دا جاس. ولار قارجىلىق تۇرعىدا اسا بەلسەندى ەمەس»، - دەيدى مەحمەت اسۋتاي.

قارجى ورتالىعىنا قاتىستى ا ق ش- تىڭ قازاقستانداعى توتەنشە جانە وكىلەتتى ەلشىسى دجوردج كرولدا ءوز پىكىرىمەن ءبولىستى.

«مەنىڭ ويىمشا «استانا» ح ق و بولاشاعى جارقىن. وڭىردە بۇرىن- سوڭدى مۇنداي قۇرىلىم بولماعان. قازاقستاندىق قارجى ورتالىعىندا جۇمىس جۇيەسى جاقسى جولعا قويىلعان. سوت، بيرجا سالاسىنداعى ەڭ وزىق ويلار تارتىلعان. ا ق ش- تىڭ NASDAQ بيرجاسى «استانا» حقو بىرلەسىپ جۇمىس ىستەۋى ءبىز ءۇشىن ۇلكەن ماقتانىش»، - دەدى امەريكان ەلشىسى.

ونىڭ ايتۋىنشا، «استانا» ح ق و ت م د، ەۋرازيالىق ەكونوميكالىق وداق اياسىندا اسا اۋقىمدى قارجىلىق ۇيىمعا اينالماق.

«امەريكاندىق بيزنەسمەندەر «استانا» ح ق و تۋرالى كوبىرەك بىلگىلەرى كەلەدى. ءتىپتى ءبىزدىڭ ەلشىلىكتە جاڭا قارجى ورتالىعىنا قىزىعۋشىلىق تانىتقاندار بار. سونداي- اق اقش ساۋدا پالاتاسىنىڭ وكىلدەرى «استانا» ح ق و اياسىندا جۇمىس ىستەۋگە نيەتتى»، - دەيدى دجوردج كرول.

بۇل رەتتە ول قارجى نارىعىنداعى باسەكەلەستىك وتە جوعارى ەكەنىن ايتا كەلە، قازاقستاندىق ورتالىق ءوز قىزمەتىن جارنامالاۋ ماسەلەسىنە باسا ءمان بەرۋ كەرەكتىگىن ەسكەرتتى.

اۆتور: داۋلەت ىزتىلەۋ