تاراز كوشەلەرى ولقى-سولقى رەتسىز جارناماعا تولىپ كەتكەن
وبلىس اكىمدىگىندە وتكەن وتىرىستا قالادا سىرتقى جارنامانى ورنالاستىرۋعا بايلانىستى سالىق الىمىنىڭ كورسەتكىشى تىڭدالدى. انىقتالعانداي، سالىق الىمىنىڭ مولشەرى ىقتيمال كورسەتكىشتەن ون ەسە از بولىپ شىقتى. سونىمەن قاتار، 190-عا جۋىق جارناما نىسانىنىڭ (بيلبوردتار، ستەللالار، تابلو مەن LED- ەكراندار) 149-ىندا زاڭناما تالاپتارىنىڭ بۇزىلعانى انىقتالعان. تەك سىرتقى جارنامانىڭ 41 يەگەرى عانا تالاپقا ساي قۇجاتتارعا يە، ولار ۋاقتىلى سالىقتارىن تولەپ جاتىر.
«تاپسىرما بىرنەشە اي بۇرىن بەرىلگەنىمەن، ءتيىستى ناتيجەنى بايقاپ وتىرعانىم جوق. قالا كوركىن بۇزىپ تۇرعان زاڭسىز جارنامانىڭ مۇرتى دا بۇزىلعان جوق. بيزنەسمەندەرگە دەگەن ەشقانداي تالاپ تا جوق. بۇرىنعىشا سالىقتى تولەمەي وتىر. جارنامالاردىڭ قانشاسى زاڭسىز ەكەنىن، ولار قاي ۋاقىتتان بەرى ءىلىنىپ تۇرعانىن انىقتاۋ كەرەك. جۇمىس مەرزىمىن ەسەپكە تىركەي وتىرىپ، ولار قانشا سالىق تولەۋ كەرەكتىگىن انىقتاۋ قاجەت. ايىپپۇلدار مەن ءتيىستى قۇجاتتارعا سايكەس كەلەتىنىن نەمەسە كەلمەيتىنىن ايقىنداعان ابزال. بۇل سالىق قىزمەتىنە جۇكتەلەتىن مىندەت»، - دەدى وبلىس اكىمى اسقار مىرزاحمەتوۆ.
قالالىق مەملەكەتتىك كىرىستەر باسقارماسىنىڭ باسشىسى كەنجەعازى ەسەمبەكوۆ بۇل باعىتتاعى جۇمىس ءقازىردىڭ وزىندە باستالىپ كەتكەنىنە سەندىردى.
تاراز قالاسى اكىمىنىڭ ورىنباسارى سايلاۋعالى باينازاروۆتىڭ ايتۋىنا قاراعاندا، بۇل جۇمىستى اتقارۋدىڭ وزىندىك قيىندىعى دا بار. سەبەبى، قازىرگى تاڭدا جەرگىلىكتى اتقارۋشى ورگانداردىڭ قىزمەتكەرلەرىندە عيماراتتىڭ كەيبىر بولىكتەرىنە جارناما ورنالاستىرۋعا تىيىم سالا الاتىنداي قۇزىرەت جوق. بارلىق 149 بۇزۋشىلىق وسى سەبەپتى تىركەلىپ وتىر.
«زاڭ بويىنشا، سىرتقى جارنامانى رەتتەۋ باعىتىندا بىزدە نورماتيۆتىك- قۇقىقتىق قۇجات تولتىرۋعا بولاتىنداي قۇقىق جوق. ەگەر ءماسليحات وبلىستىق ادىلەت دەپارتامەنتىندە بەكىتىلگەن ايماقتىڭ كۇتىمى مەن كوگالداندىرۋى بويىنشا ەرەجەنىڭ 47-بابىنا وزگەرىس ەنگىزەتىن بولسا، بالكىم بۇل ماسەلە شەشىلۋى مۇمكىن»، - دەيدى ول.
اسقار مىرزاحمەتوۆ ەرەجە بۇزعان كاسىپكەردىڭ ناقتى ايىپپۇلدىڭ سوماسىن تارتۋ كەرەكتىگىن اتاپ ءوتتى.
«ەگەر ايىپپۇل سوماسى كوپ بولىپ جاتسا، ول كاسىپكەر كەلەسىدە ونداي قاتەلىككە جول بەرمەيدى. ال ەگەن جارنامانىڭ قالعانىن قالاسا، اقشاسىن تولەسىن. مىنە، ماسەلە وسىلاي شەشىلەدى. نورماتيۆتىك- قۇقىقتىق قۇجاتقا ەندەشە ەشقانداي وزگەرىس ەنگىزۋدىڭ قاجەتى جوق. ءتىپتى سالىقتى تولەۋگە دايار كەزدىڭ وزىندە جارنامانىڭ جالپى ستاندارتقا ساي كەلەتىنىن نەمەسە كەلمەيتىنىن انىقتاۋ كەرەك. ول ءۇشىن ەڭ الدىمەن جاي عانا ساۋدا ۇيلەرىن ارالاپ شىعىڭىزدار»، - دەدى ايماق باسشىسى.
ەسكە سالا كەتسەك، بۇدان بۇرىن قالالىق اكىمدىكتىڭ قىزمەتكەرلەرى جۇرگىزگەن رەيد كەزىندە ارنايى كوميسسيا قالانىڭ ينفراقۇرىلىمدىق جاي- كۇيىن، سونىڭ ىشىندە سىرتقى جارنامالار جايىن زەرتتەگەن بولاتىن. رەيد جۇمىستارى ءۇش باعىتتا، اتاپ ايتقاندا ءتىل تۋرالى زاڭنىڭ ساقتالۋى، جارنامانى ورناتۋعا بەرىلەتىن رۇقسات، قۇرىلىم نورمالارى مەن نىساندارعا جارناما ورناتۋ تالاپتارى بويىنشا جۇرگىزىلگەن. كوميسسيانىڭ مۇشەلەرى جارنامالاردىڭ زاڭدىلىعى مە ساپاسىن زەرتتەپ، نىسان يەلەرىنە ءتيىستى ەرەجەلەردىڭ تالاپتارىن، سونداي-اق، «ءتىل تۋرالى» جانە «جارناما تۋرالى» زاڭنىڭ تالاپتارىن تۇسىندىرگەن ەدى. كوميسسيا سول كەزدە كوپتەگەن نىسانداردا تالاپقا جاۋاپ بەرمەيتىن جارنامالاردىڭ ورنالاستىرىلعانىن انىقتاعان.
