نۇرسۇلتان نازاربايەۆ گونگ سوعۋ ارقىلى ا ح ق و قىزمەتىن ىسكە قوستى

استانا. قازاقپارات - بۇگىن ەلورداداعى كونگرەسس ورتالىقتا ەلباسى نۇرسۇلتان نازاربايەۆ «استانا» حالىقارالىق قارجى ورتالىعىنىڭ رەسمي قىزمەتىن ارنايى گونگ سوعۋ ارقىلى ىسكە قوستى، دەپ حابارلايدى قازاقپارات ءتىلشىسى.

«ۇزاق ۋاقىت كۇتكەن ءساتتىڭ تۋىنداۋىمەن قۇتتىقتايمىن جانە وسىدان باستاپ ءبىزدىڭ حالىقارالىق قارجى ورتالىعىمىز قىزمەتىنە كىرىستى. وسى جەردە وتىرعان بارلىق ورتالىق قاتىسۋشىلارىنا، ۋاقىتىن ءبولىپ كەلىپ وتىرعان قىمباتتى قوناقتارىمىزعا شىنايى ريزاشىلىعىمدى بىلدىرەمىن. ءبىزدىڭ ەلىمىزگە نەبارى - 27 جىل. بۇل تاريح ءۇشىن قاس-قاعىم ءسات. دەگەنمەن، ءبىزدىڭ حالقىمىز بولاشاق گۇلدەنۋ جولىندا ۇلكەن قادام جاسادى دەپ ويلايمىن. «استانا» حالىقارالىق قارجى ورتالىعى دا وسى ماقساتقا قىزمەت ەتەتىندىگىنە ءۇمىت ارتامىز. ءبىز ءوز تاراپىمىزدان ورتالىقتىڭ جۇمىسى بارلىعىنا قاناعاتتانۋشىلىق سىيلايتىنداي، بيزنەسكە پايدا اكەلەتىندەي جانە قازاقستان ودان مول پايدا الاتىنداي جاسايتىن بولامىز»، - دەدى ورتالىقتىڭ تۇساۋىن رەسمي كەسكەن نۇرسۇلتان نازاربايەۆ.

وسىدان كەيىن قازاقستان پرەزيدەنتى ورتالىققا ەڭ ءبىرىنشى بولىپ تىركەلگەن 50 كومپانيا وكىلدەرىمەن ەستەلىك سۋرەتكە ءتۇستى.

بۇعان دەيىن حابارلاعانىمىزداي، ەلباسىنىڭ قاتىسۋىمەن «استانا» ح ق و- نىڭ رەسمي اشىلۋ ءراسىمى ءوتتى.

شارا بارىسىندا نۇرسۇلتان نازاربايەۆ استانا - تاۋەلسىزدىگىمىزدىڭ، ەلىمىزدىڭ بەرەكە-بىرلىگىنىڭ، دامۋىنىڭ، دارەجەسىنىڭ سيمۆولى، بارلىق باستامالار مەن وڭ وزگەرىستەردىڭ فلاگمانى ەكەندىگىن باسا ايتقان ەدى.

اۆتور: مارلان جيەمباي