موڭعوليا وليمپيادا ويىندارىنىڭ ەڭ الىپ سيمۆولىن ورناتىپ، گيننەس كىتابىنا ەنبەك

موڭعوليا استاناسى ۋلانباتىر قالاسىندا ەلدىڭ نىسانا كوزدەۋ فەدەراتسياسى باسقارمالارىنىڭ اتسالىسۋىمەن «360 قايرات قاسيەت - تاعات تۇراعى» اتتى ساداق اتۋ الاڭى اشىلدى. كلاسسيكالىق ساداق اتۋدان اتالمىش الاڭ مەملەكەتتىڭ قارجىلاندىرۋىنسىز، جەكە ازاماتتاردىڭ دەمەۋشىلىگىمەن سالىندى. جوبانىڭ قۇرىلىسىنا 222 ميلليون موڭعوليا توگروگى (31 ميلليون 800 مىڭ تەڭگەگە جۋىق) جينالعان. سونداي-اق الاڭدا جابىق ساراي بولادى، ونى تولىق اياقتاۋعا 400 ميلليون توگروگ (57 ميلليون 143 مىڭ تەڭگە) كولەمىندە قارجى قاجەت.

حالىقارالىق ستاندارت بويىنشا نىسانا كوزدەۋ الاڭىن سالۋ ءۇشىن تەك كوگالداندىرۋدىڭ وزىنە 930 مىڭعا جۋىق ا ق ش دوللارى، موڭعول اقشاسىمەن 2 ميللياردقا جۋىق توگروگ جۇمسالادى. جوبا جەتەكشىلەرىنىڭ ايتۋىنشا، قوسالقى نىساندارعا بۇدان دا كوپ شىعىن شىعادى.

سونداي-اق نىساننىڭ اۋماعىندا وليمپيادا ويىندارىن بەينەلەيتىن بەس ساقينانىڭ الىپ نۇسقاسى ورناتىلۋدا. ونى گيننەس كىتابىنا ەنگىزۋ جوسپارلانۋدا.

«ۇلتتىق پارك اۋلاسىندا شۆەيتساريا ستاندارتىمەن سالىنىپ جاتقان «360 قايرات قاسيەت - تاعات تۇراعى» الاڭىنداعى ەرەكشە جاسامپازدىق ىستەردىڭ ءبىرى - الەمدىك بىرلىكتىڭ سيمۆولى سانالاتىن وليمپيادا ويىندارىنىڭ بەس ساقيناسىنىڭ ەڭ الىپ نۇسقاسىن ورناتۋ. ونى گەننيس رەكوردتار كىتابىنا ەنگىزۋ جوسپاردا بار»، - دەيدى جوبا جەتەكشىسى، موڭعوليا نىسانا كوزدەۋ فەدەراتسياسىنىڭ باسقارما مۇشەسى سۇحبااتارىن ەردەنەبولد.

قازىرگى ۋاقىتتاعى رەكورد 2012-جىلى لوندوندا وتكەن وليمپيادا ويىندارىندا اعىلشىندار ورناتقان ساقينالارعا تيەسىلى. ولاردىڭ ەنى - 25 مەتر، بيىكتىگى - 11,5 مەتر. اتالمىش سيمۆولدى اعىلشىندار 2016-جىلى وليمپيادانى وتكىزگەن ريو-دە-جانەيرو قالاسىنا سىيعا تارتقان ەدى. قازىر ول ريو-دە-جانەيروداعى Madurese Gardens ساياباعىنىڭ كوركىن كەلتىرۋدە. الەمدەگى ەڭ ءىرى وسى وليمپيادالىق ساقينانى جاساۋعا 317817 فۋنت جۇمسالعان.

موڭعوليانىڭ ۇلتتىق ساياباعىندا سالىنىپ جاتقان وليمپيادالىق ساقينالارعا كەلسەك، ونىڭ ەنى 27 مەتر، بيىكتىگى 14 مەتر بولادى. بۇل كەرەمەت جوبا سپورتشىلاردىڭ ىنتاسىن ارتتىرۋعا، نىسانا كوزدەۋ سپورتىمەن شۇعىلدانۋشى جاستار مەن جەتكىنشەكتەرگە جىگەر بەرۋگە جانە تۋريستەردى تارتۋعا باعىتتالعان.

ايتا كەتەيىك، موڭعوليادان نىسانا كوزدەۋدەن العاشقى الەم چەمپيونى 1970-جىلى شىققان. بۇل سپورت ءتۇرىنىڭ دامىعانىنا 58 جىل بولسا دا، نىسانا كوزدەۋ الاڭىنىڭ جوقتىعى، اتالمىش سپورت ءتۇرىنىڭ دامۋىنا، ونىمەن اينالىسۋشىلارعا كەدەرگى كەلتىرۋدە.

جاسامپازدىق ءىستى جۇزەگە اسىرۋ ءۇشىن الەمنىڭ 10 ەلىندە تۇراتىن موڭعوليا ازاماتتارى مەن جەرگىلىكتى حالىق ءوز ۇلەستەرىن قوسۋدا.