ازەربايجان، ۋكراينا، ارمەنيا باسشىلارى نۇرسۇلتان نازاربايەۆتى قۇتتىقتادى
ماسەلەن، ازەربايجان رەسپۋبليكاسىنىڭ پرەزيدەنتى يلحام اليەۆ نۇرسۇلتان نازاربايەۆتىڭ باسشىلىعىمەن قازاقستاننىڭ قول جەتكىزگەن جەتىستىكتەرىن اتاپ كورسەتە كەلىپ، مەملەكەت باسشىسىن تۋعان كۇنىمەن قۇتتىقتادى.
«مەملەكەتتىلىكتى نىعايتۋ، ەلدىڭ الەۋمەتتىك-ەكونوميكالىق جوعارىلاۋى، ونىڭ بەدەلىنىڭ كۇن وتكەن سايىن ارتۋى ءسىزدىڭ كوشباسشىلىعىڭىزدىڭ، دانا دا كورەگەن ساياساتىڭىزدىڭ ناتيجەسىندە مۇمكىن بولدى. ءسىزدىڭ ەلدەرىمىزدىڭ اراسىنداعى قارىم-قاتىناستى دامىتۋ مەن نىعايتۋعا قوسقان ۇلەسىڭىز ولشەۋسىز. ستراتەگيالىق سيپاتقا يە ازەربايجان- قازاقستان دوستىعى مەن ىنتىماقتاستىعى الداعى ۋاقىتتا دا ءبىزدىڭ حالىقتارىمىزدىڭ مۇددەسىنە قىزمەت ەتەتىنىنە سەنىمدىمىن»، - دەلىنگەن جەدەلحاتتا.
* * *
ۋكراينا پرەزيدەنتى پەتر پوروشەنكو نۇرسۇلتان نازاربايەۆقا دەنساۋلىق، كۇش-جىگەر مەن جاڭا جەتىستىكتەر، ال قازاقستان حالقىنا ءوسىپ-وركەندەۋ تىلەدى.
«ۋكراينا مەن قازاقستان اراسىنداعى دوستىق جانە ارىپتەستىك قارىم-قاتىناستار، سونداي-اق ءبىزدىڭ ازاماتتارىمىزدىڭ اراسىنداعى ىزگى نيەتتى بايلانىستار ەكى ەلدىڭ ءارى قاراي دا ءوسىپ-وركەندەۋى مەن ءوزارا ءتيىمدى ىنتىماقتاستىعىنا نەگىز بولادى»، - دەلىنگەن جەدەلحاتتا.
* * *
ارمەنيا رەسپۋبليكاسىنىڭ پرەمەر-ءمينيسترى نيكول پاشينيان ءوزىنىڭ قۇتتىقتاۋىندا دوستىق قارىم-قاتىناس پەن ءوزارا قۇرمەت ارناسىنداعى بىرلەسكەن كۇش-جىگەر ارمەنيا قازاقستان قارىم-قاتىناسىن ورىستەتۋگە وڭ ىقپال ەتەتىنىنە سەنىم بىلدىرەدى.
«ءسىزدىڭ مەملەكەت باسشىسى لاۋازىمىنداعى ەكونوميكانى دامىتۋ مەن قازاقستاننىڭ حالىقارالىق ارەناداعى بەدەلىن نىعايتۋعا باعىتتالعان قىزمەتىڭىز ءوزىڭىز جۇرگىزىپ كەلە جاتقان ورنىقتى باعدار ناتيجەسىندە مەملەكەتتىك قۇرىلىس تۇرعىسىنان وزىندىك قولتاڭباڭىزدى ايشىقتايدى»، - دەلىنگەن جەدەلحاتتا.
* * *
ماسكەۋ مەن بۇكىل رەسەي پاتريارحى كيريلل ءوزىنىڭ قۇتتىقتاۋ حاتىندا مەملەكەت باسشىسىنىڭ باسشىلىعىمەن جۇزەگە اسىرىلىپ، قازاقستاننىڭ ءوسىپ-وركەندەۋىنە باعىتتالعان ءبىرقاتار ايتۋلى الەۋمەتتىك جانە ەكونوميكالىق جوبالاردى اتاپ وتەدى.
«كوپ جىل بويى قازاقستاننىڭ كوشباسشىسى بولا وتىرىپ، ءسىز ءوزىڭىزدى سول جىلدار بەدەرىندە سالماقتى دا دايەكتى شەشىم قابىلدايتىن تالانتتى باسشى رەتىندە كورسەتتىڭىز. ءسىزدىڭ باستامالارىڭىزدىڭ تابىستىلىعىنا بۇگىندە رەسپۋبليكانىڭ يگىلىگىنە اينالعان بەرىك ءدىنارالىق كەلىسىم مەن ۇلتارالىق تۇسىنىستىك قىزمەت ەتىپ وتىر»، - دەلىنگەن جەدەلحاتتا.
ەلباسىن تۋعان كۇنىمەن قىتاي حالىق رەسپۋبليكاسىنىڭ ءتوراعاسى شي جينپيڭ، وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ، تاجىكستان رەسپۋبليكاسىنىڭ پرەزيدەنتى ەمومالي راحمون، موڭعوليا پرەزيدەنتى حالتامااگيين باتتۋلگا قۇتتىقتاعان بولاتىن.
«ەگەمەن قازاقستان» گازەتى
