بيىل نوبەل سىيلىعىن تابىستاعاننان كەيىنگى ءداستۇرلى كونسەرت بولمايدى

استانا. قازاقپارات - وسلودا جىل سايىن بەيبىتشىلىك باعىتىنداعى نوبەل سىيلىعىن تاپسىرعاننان كەيىن وتكىزىلىپ كەلگەن ءداستۇرلى كونسەرت بيىل بولمايدى، دەپ حابارلايدى «قازاقپارات» ح ا ا- نىڭ مەنشىكتى ءتىلشىسى.

بۇل تۋرالى نوبەل ينستيتۋتىنىڭ، Warner Bros Norway جانە Gyro Event كومپانيالارىنىڭ بىرلەسكەن مالىمدەمەسىندە ايتىلعان. ۇيىمداستىرۋشىلار «كونسەرتتىڭ فورماتى مەن كونتەنتىن قايتا قاراۋ قاجەتتىگى جانە سوڭعى جىلدارداعى قارجىلىق جاعداي وسىعان يتەرمەلەپ وتىرعانىن» ايتادى. ەندى ولار جاڭا پلاتفورمانى قاراپ شىقپاق. ويتكەنى، سمارتفوندار كەڭ تاراعاننان كەيىن، كونسەرتتىڭ بۇرىن مەتسەناتتاردىڭ قاراجاتى ەسەبىنەن اقى تولەنگەن «جاندى» تەلەۆيزيالىق اۋديتورياسىن بۇرىنعىسىنشا ۇستاپ وتىرۋ مۇمكىن ەمەس. نورۆەگياداعى اسا ءىرى بولشەك ساۋدا جەلىلەرىنىڭ ءبىرى وسىنداي شارانىڭ دەمەۋشىسى بولعان ەدى، ءبىراق ۇيىمداستىرۋشىلار ونىڭ اقىسىن تولەي الماعان.

وسلوداعى «سپەكترۋم» ارەناسىندا وتەتىن ءداستۇرلى كونسەرتكە 1994-جىلدان بەرى ۋيتني حيۋستون، لەدي گاگا سەكىلدى جۇزدەگەن شوۋ-جۇلدىزدار كەلگەن.

داستۇرگە وراي، بەيبىتشىلىك باعىتىنداعى نوبەل سىيلىعىن تابىستاۋ ءراسىمى جىل سايىن شۆەتسيالىق كاسىپكەر ءارى ونەتاپقىش الفرەد نوبەل دۇنيە سالعان كۇندە - 10- جەلتوقسان كۇنى وتەدى.

سىيلىقتى 1901-جىلدان بەرى وسلوداعى نوبەل بەيبىتشىلىك كوميتەتى الەمدە بەيبىتشىلىكتى ورناتۋعا زور ۇلەس قوسقان جەكە تۇلعالارعا نەمەسە ۇيىمدارعا تابىستاپ كەلەدى.