ق ر پرەزيدەنتىنە ازيا پاراليمپيالىق كوميتەتىنىڭ قۇرمەت وردەنى تاپسىرىلدى
مەملەكەت باسشىسى جازعى جانە قىسقى پاراليمپيالىق سپورت تۇرلەرى بويىنشا ۇلتتىق قۇراما كوماندالار مەن سپورتتىق رەزەرۆتى ساپالى ءارى كاسىبي دايىنداۋ ءۇشىن سالىنعان ەلوردانىڭ جاڭا بىرەگەي سپورت كەشەنىمەن تانىستى.
نۇرسۇلتان نازاربايەۆ ويىن زالىن، كۇرەس زالى مەن جاتتىعۋ بولمەلەرىن ارالاپ كورىپ، سپورتشىلارمەن جانە باپكەرلەر قۇرامىمەن اڭگىمەلەستى.
«وزدەرىڭىزدىڭ تاباندىلىقتارىڭىز بەن ەرىك-جىگەرلەرىڭىزدىڭ ارقاسىندا ەلىمىزدىڭ داڭقىن اسقاقتاتىپ جۇرسىزدەر. مەن سىزدەردىڭ ەڭبەكتەرىڭىز بەن ءورشىل قاسيەتتەرىڭىزگە ءتانتىمىن. سىزدەر بارشا جۇرتقا لايىقتى ۇلگى كورسەتىپ كەلەسىزدەر»، - دەدى قازاقستان پرەزيدەنتى.
نىساندى ارالاپ كورۋ بارىسىندا مەملەكەت باسشىسى XII قىسقى پاراليمپيا ويىندارىنىڭ چەمپيونى الەكساندر كوليادينگە سپورتتاعى جەتىستىگى ءۇشىن ەستەلىككە سىيلىق تارتۋ ەتتى.
سونىمەن قاتار، سپورتتىق نىساننىڭ اشىلۋ راسىمىندە ازيا پاراليمپيالىق كوميتەتىنىڭ پرەزيدەنتى مادجيد راشەد نۇرسۇلتان نازاربايەۆقا وسى ۇيىمنىڭ قۇرمەت وردەنىن تاپسىردى.
م. راشەد بۇل سىيلىق قازاقستان پرەزيدەنتىنىڭ ەلىمىزدەگى پاراليمپيالىق قوزعالىسقا قوسقان زور ۇلەسىن، سونداي-اق ەلباسىنىڭ ەرەكشە مۇقتاج ادامداردى الەۋمەتتىك قورعاۋ جانە بارلىق ازاماتتار ءۇشىن بىردەي مۇمكىندىكتەردى قامتاماسىز ەتۋ ارقىلى تۇراقتى قولداۋ كورسەتۋىن مويىنداۋدىڭ بەلگىسى ەكەنىن اتاپ ءوتتى.
