جاپوندار نەگە تازالىق سۇيگىش؟
FIFA دەرەگى بويىنشا، بيلەتتەردىڭ 30 پايىزىن جەرگىلىكتى حالىق ساتىپ السا، قالعان بولىگى شەتەلدىك جانكۇيەرلەر ۇلەسىنە ءتيىپتى. ءبارى دە ءتورت جىلدا ءبىر كەلەتىن مۋنديال قىزىعى ءۇشىن، ارينە. ءبىراق دوپ دوداسىنا كوز تىككەن الەم تەك فۋتبولشىلارعا عانا تامسانىپ جاتقان جوق، سونداي- اق جانكۇيەرلەردىڭ بىرلىگىنە، قولداۋ كورسەتۋىنە، مادەنيەتىنە دە ىقىلاس ءبىلدىرىپ جاتىر.
2016 -جىلى وتكەن ەۋروپا چەمپيوناتىندا جۇرتتى باۋراپ العان يسلانديا قۇراماسىنىڭ جانكۇيەرلەرى ەدى. ولاردىڭ اتاقتى ۇراندارى ترەندكە اينالىپ، كەيىن يسلانديالىقتار ۇلگىسىمەن وزگە ەلدەردىڭ جانكۇيەرلەرى ۇرانداتا باستادى.
ال بيىلعى دوپ دوداسىندا جاپونيا جانكۇيەرلەرى ەرەكشە ءسۇيسىنتتى. ولار يسلانديالىقتار سياقتى جانكۇيەرلىك ۇرانمەن ەمەس، مادەنيەتپەن قايران قالدىردى. ءار ويىن سوڭىندا بۇل قۇراما جانكۇيەرلەرى وزدەرى وتىرعان سەكتورداعى قوقىستاردى جيناپ، مادەنيەتتىڭ جوعارعى ۇلگىسىن كورسەتىپ ءجۇر. مۇنداي تازالىق مادەنيەتى تەك جانكۇيەرلەردە ەمەس، قۇرامانىڭ ويىنشىلارىندا دا بار. فۋتبولشىلار 1/8 فينالدا بەلگيا قۇراماسىمەن كەزدەسىپ، جارىستان شىعىپ قالعاننان كەيىن كيىم اۋىستىرۋ بولمەسىن تاپ- تۇيناقتاي ەتىپ جيناپ كەتىپ، ارتىنان ۇيىمداستىرۋشى رەسەي ەلىنە راقمەتىن حات تۇرىندە قالدىرىپ كەتكەن. جاپونداردىڭ ءبارى بىردەي وسىنداي ما؟ الدە بۇل زاڭ كۇشىنىڭ ناتيجەسى مە؟ اسىلىندا بۇل - حالىق ساناسىنا سىڭگەن مادەنيەت.
فۋتبولشى مايا يوسيدا بىلاي دەيدى: «جاپون ۇعىمىنا سۇيەنسەك، كەز كەلگەن ورىندى ساعان دەيىنگى تازا قالپىنان دا تازارتىپ كەتۋ كەرەك. سوندىقتان ءبىزدىڭ ىسكە تاڭ قالۋدىڭ قاجەتى جوق». بۇعان جاپونياداعى رەفورمالار مەن ءتارتىپتىڭ اسەر ەتكەنى دە راس. سوعىستان كەيىنگى يندۋسترياليزاتسيادان كەيىن قوقىس جاپونيا ءۇشىن كۇن ءتارتىبىنىڭ ماسەلەسىنە اينالدى. قوقىس توگەتىن جەر ازايدى، شەتكە شىعارىلاتىندارى ءوز ۋاقىتىنان كەشىكتىرىلىپ ءجۇردى. ناتيجەسىندە 90-جىلداردىڭ ورتاسىندا جاپونيا زاڭ قابىلداپ، ارتىنشا 2001 -جىلى قورشاعان ورتا مينيسترلىگى قۇرىلدى. سودان بەرى جاپونيا ءۇشىن قوقىس پەن قورشاعان ورتا ماسەلەسى وڭالىپ، ءتىپتى دامىپ كەتتى.
قازىر تۇرعىندار قوقىستى جاناتىن، جانبايتىن، قايتا وڭدەلەتىن جانە ءىرى قوقىس دەپ سۇرىپتاپ جينايدى. ءار قوقىس ءتۇرىنىڭ ءتۇرلى- ءتۇستى ءوز قابى بار جانە سۇرىپتالعان قوقىس ءتۇرىن سىرتقا شىعارىپ قويۋ كۇندەرى دە بەلگىلەنگەن. ەرەجە بۇزىلسا، تۇرعىندار ايىپپۇل تولەيدى. جاپونيادا قوقىس كومىلمەيدى جانە جينالمايدى. تەحنولوگتار سۇرىپتالعان قوقىستى ورتەيدى دە، قالدىقتارىن عيماراتتار ىرگەتاسىنا پايدالانادى.
جاپونيا كوشەلەرىندە قوقىس جاشىكتەرى از، سوعان قاراماستان قوقىس كەزدەستىرۋ قيىننىڭ قيىنى. بۇعان ءىرى كولەمدەگى ايىپپۇلدىڭ دا اسەرى بار. زاڭسىز قالدىرىلعان قوقىس ءۇشىن مۇندا 25 ميلليون تەڭگە ايىپپۇل سالىنادى.
Massaget.kz
