استانادا سۋعا باتقان بالانى قۇتقارىپ قالعاندار تابىلدى

استانا. قازاقپارات - ق ر ءى ءى م توتەنشە جاعدايلار كوميتەتى سۋعا باتىپ بارا جاتقان بالانىڭ ءومىرىن ساقتاپ قالعان ازاماتتاردى ماراپاتتايدى، دەپ حابارلايدى قازاقپارات ءتىلشىسى ت ج ك رەسمي وكىلى رۋسلان يمانقۇلوۆقا سىلتەمە جاساپ.

«ۇلكەندەردىڭ قاراۋىنسىز قالعان بالا ەسىل وزەنىنىڭ جاعاسىندا ويناپ جۇرگەندە ابايسىزدا سۋعا ءتۇسىپ كەتىپ، وزدىگىنەن شىعا الماعان. سول ماڭداعى ادامدار ونى بايقاپ قالىپ، بالانى قۇتقارعان. بىزدەگى دەرەك بويىنشا، بالا 5-6 جاس شاماسىندا»، - دەيدى ر. يمانقۇلوۆ قازاقپارات تىلشىسىنە تەلەفون ارقىلى بەرگەن سۇحباتىندا.

ونىڭ ايتۋىنشا، كىشكەنتاي بالانى ينكاسساتور ارمان سماعۇلوۆ، ستۋدەنتتەر - انگەلينا دارمەنبايەۆا جانە تيمۋر ناسيبۋلليندەر قۇتقارعان.

ت ج ك وكىلدەرى ولارمەن بايلانىسىپ ۇلگەرگەن.

«ءبىز ۇزبەي بايلانىس جاساپ وتىرمىز، جۋىق ارادا بالانىڭ ءومىرىن ساقتاپ قالعان ازاماتتاردى ماراپاتتايمىز. قازىر وقيعانىڭ تولىق ءمان- جايىن ءبىلۋ جانە وعان قاتىسقانداردىڭ ءبارىن اتاپ ءوتۋ ءۇشىن سول قۇتقارىلعان بالانىڭ ءوزىن ىزدەپ جاتىرمىز»، - دەيدى ر. يمانقۇلوۆ.

ەسكە سالا كەتەيىك، كەشە استانادا سۋعا باتىپ بارا جاتقان بالانى بەلگىسىز ادامداردىڭ قۇتقارىپ العانى تۋرالى حابارلاعان بولاتىنبىز.