ەلباسى استاناداعى مانشۇك مامەتوۆانىڭ ەسكەرتكىشىنە گۇل شوقتارىن قويدى
مەملەكەت باسشىسى شارا بارىسىندا كەڭەس وداعىنىڭ باتىرى مانشۇك مامەتوۆانىڭ ەسكەرتكىشىنە گۇل شوقتارىن قويدى.
قازاقستان پرەزيدەنتى «وڭىرلەردىڭ استاناعا تارتۋى» جوباسى اياسىندا باتىس قازاقستان وبلىسى سالعان «اقجايىق» ساياباعىن ارالاپ كوردى.
سونىمەن قاتار، نۇرسۇلتان نازاربايەۆ باتىس قازاقستان وبلىسىنىڭ جۇرتشىلىق وكىلدەرىمەن، ەلورداداعى «سارىارقا» اۋدانىنىڭ تۇرعىندارىمەن جانە مانشۇك مامەتوۆانىڭ تۋىستارىمەن اڭگىمەلەستى.
مەملەكەت باسشىسى «وڭىرلەردىڭ استاناعا تارتۋى» جوباسىنىڭ ەلوردانى الەۋمەتتىك ءارى مادەني تۇرعىدا دامىتۋ ىسىندەگى ماڭىزدىلىعىن اتاپ ءوتتى.
ايتا كەتەرلىگى، ساياباق اۋماعىندا مانشۇك مامەتوۆانىڭ ەسكەرتكىشى، سۋبۇرقاق، 100 ورىندىق امفيتەاتر، «سيقىرلى لابيرينت» اتتى ينستاللياتسيا، تاقىرىپتىق الاڭدار، سونداي-اق باسكەتبول ويناۋعا جانە جۇگىرۋگە ارنالعان الاڭدار بار.
