ارشاۆين الەم بىرىنشىلىگىندەگى رەسەي قۇراماسىنىڭ مۇمكىندىگىنە بولجام جاسادى

الماتى. قازاقپارات - قازاقستاندىق فۋتبولشى باۋىرجان يسلامحان مەن رەسەيلىك اندرەي ارشاۆين فۋتبولدان الەم بىرىنشىلىگى تۋرالى ويلارىن ورتاعا سالدى.

ءا چ-2018 توڭىرەگىندەگى پىكىرلەر الماتىدا جەدەل تاماقتانۋ قىزمەتىن كورسەتەتىن قازاقستاندىق كومپانيا ۇيىمداستىرعان بريفينگتە ايتىلدى، دەپ حابارلايدى قازاقپارات ءتىلشىسى.

اندرەي ارشاۆين رەسەي قۇراماسىن شيرەك فينالعا وتكەن كوماندالاردىڭ ىشىندەگى ءالسىزى دەپ سانايدى. سوعان قاراماستان ول الەم چەمپيوناتىنىڭ كۋبوگىنا رەسەي كومانداسى يە بولعانىن قالايدى.

«شيرەك فينالعا شىققان كوماندالار اراسىندا رەسەي قۇراماسىنىڭ جەڭىستەن ءۇمىتى از. كوماندانىڭ كەلەسى ماتچتاعى قارسىلاسى - حورۆاتيا دا وتە مىقتى. رەسەيدىڭ يسپانيامەن بولعان كەزدەسۋى ورىستار ءۇشىن وڭايعا سوققان جوق. حورۆاتيامەن ماتچ تا سولاي بولۋى ىقتيمال. دەگەنمەن ءبارى مۇمكىن. يسپانيانى جەڭگەن رەسەي باسقاسىن دا باسىپ وزۋى عاجاپ ەمەس. سوڭعى ونجىلدىقتا رەسەيدىڭ مىقتى قاقپاشىسى سانالعان يگور اكينفەيەۆتى ايتپاعاندا، رەسەيلىكتەردىڭ فيزيكالىق تۇرعىدان دايىندىعى وتە جاقسى دەۋگە بولادى. وعان قوسا جانكۇيەرلەردىڭ ەرەكشە قولداۋى رەسەي قۇراما كومانداسىنىڭ جاقسى ويىن كورسەتۋىنە ىقپالىن تيگىزۋدە. بۇعان دالەل - كوماندانىڭ بۇگىنگە دەيىنگى كورسەتكەن ناتيجەسى»، - دەدى ارشاۆين جۋرناليستەردىڭ ساۋالىنا.

فۋتبولشى بۇعان دەيىنگى باسپا ءسوز بەتتەرىندەگى سۇحباتىندا الەم چەمپيوناتىنىڭ كەلبەتى - برازيليا مەن فرانسيا قۇراماسى دەگەن بولاتىن.

«ەگەر اقتىق كەزەڭدە برازيليا مەن فرانسيا كەزدەسەتىن بولسا، برازيليا قۇراماسىنىڭ كۇشى باسىم تۇسەدى دەپ ويلايمىن. الايدا مەن رەسەي قۇراماسىنا جاقتاسامىن»، - دەدى ارشاۆين.

ال، قازاقستاندىق فۋتبولشى باۋىرجان يسلامحان جاقسى ويىنعا جانكۇيەر بولاتىنىن جەتكىزدى.

«مەن فۋتبولدان الەم بىرىنشىلىگىندە ارگەنتينا مەن يسپانيانىڭ ويىنىنا قولداۋ ءبىلدىردىم. يسپانيا قۇراماسىنىڭ ويىنشىسى ينەستانى ۇناتامىن. ءبىراق وزدەرىڭىز بىلەتىندەي، ولار ويىننان شىعىپ قالدى. بۇعان بولا كوڭىلىمدى تۇسىرگەن جوقپىن، مەن ءارقاشان جاقسى ويىننىڭ جانكۇيەرىمىن»، - دەدى باۋىرجان يسلامحان.

جۋرناليستەر «قايرات» فۋتبول كومانداسىنىڭ جارتىلاي قورعاۋشىسىنان قازاقستان قۇراماسىنىڭ الەمدىك دوپ دوداسىنا قاشان قاتىساتىنىن سۇراۋدى ۇمىتقان جوق.

«قىركۇيەك ايىندا وتەتىن ۋەفا ۇلتتار ليگاسىندا جاقسى ويىن كورسەتسەك، الەم بىرىنشىلىگىنە قاتىسۋعا مۇمكىندىك الامىز دەگەن ويدامىز»، - دەدى باۋىرجان يسلامحان.

فۋتبولدان كەلەسى الەم چەمپيوناتى 2022 -جىلى كاتاردا وتەدى.

اۆتور: ارايلىم جولداسباي