جاقسىبەكوۆ استانانىڭ ايازدى كۇندەرى ەلباسىنىڭ ايتقان سوزدەرىن ەسكە الدى

 استانا. قازاقپارات - ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ مەملەكەتتىك قىزمەتكە قالاي كەلگەنىن جانە استانانىڭ ايازدى كۇندەرى جۇرگىزىلگەن قۇرىلىس جۇمىستارى تۋرالى ەسكە الدى، دەپ حابارلايدى قازاقپارات.

ايتا كەتەيىك، ادىلبەك جاقسىبەكوۆ 1997-2003 جانە 2014-2016 -جىلدارى ارالىعىندا استانا قالاسىنىڭ اكىمى بولعان. 1994 -جىلى ەلوردانى اۋىستىرۋ شەشىمى جاريالانعاندا ول اقمولادا بيزنەسپەن اينالىسىپ جۇرگەن.

«وسى جەردە ءوستىم، مەنىڭ تۋعان قالام وسى. استانانىڭ كوشىرىلەتىنى تۋرالى جاڭالىقتى مەنىڭ جەرلەستەرىم ۇلكەن قۋانىشپەن ءارى ۇمىتپەن قارسى الدى. ءبارى دە استانا مارتەبەسىمەن بىرگە اقمولاعا جاڭا ءومىر كەلەدى دەپ كۇتتى. ءبىراق ول كەزدە مەن، ارينە مەملەكەت باسشىسى شەشىمىنىڭ مەنىڭ تاعدىرىمدى سونشالىقتى وزگەرتەتىنىن بىلگەن جوقپىن. ونى ايتاسىز، بۇكىل ەلدى، كۇللى قازاقستاندىقتار تاعدىرىن وزگەرتەرىن كىم بىلگەن» ، - دەپ ەسكە الدى ادىلبەك جاقسىبەكوۆ «ەگەمەن قازاقستان» گازەتىندە جاريالانعان «استانا - قازاقستان تاۋەلسىزدىگىنىڭ نىشانى» ماقالاسىندا.

ءبىراز ۋاقىت وتكەن سوڭ ادىلبەك جاقسىبەكوۆ قازاقستان كاسىپكەرلەرىنىڭ العاشقى بۋىنىنىڭ وكىلى رەتىندە سەنات دەپۋتاتى بولىپ سايلانعان. پارلامەنتتە نارىقتىق رەفورمانى زاڭنامالىق تۇرعىدان قامتاماسىز ەتۋدە جۇمىس ىستەگەن.

 «1996 -جىلعى قىركۇيەكتىڭ ءبىر كۇنى اياق استىنان پرەزيدەنت اكىمشىلىگىنە شاقىرتۋ الدىم. اقمولا وبلىسىندا اكىمنىڭ ءبىرىنشى ورىنباسارى لاۋازىمى ەنگىزىلىپ، ول جاڭا استانانىڭ ەكونوميكاسى مەن قۇرىلىسىنا جاۋاپ بەرەتىن بولدى. مەملەكەتتىك قىزمەتشى رەتىندە باعىمدى سىناپ كورۋىمە مۇمكىندىك بەرىلدى. كوپ ويلانباستان، ارينە كەلىستىم. بۇل ۇلى ىسكە ءوز ۇلەسىڭدى قوسۋ مۇمكىندىگى ەكەنى ايدان انىق ەدى. شايقالىپ جۇرمەستەن، جۇمىسقا بىردەن كىرىسىپ كەتۋگە تۋرا كەلدى» ، - دەپ جازدى ول.

 جاقسىبەكوۆتىڭ ايتۋىنشا، استانانى كوشىرۋدىڭ مەرزىمى 1997 -جىلدىڭ سوڭى دەپ ناقتى بەلگىلەندى جانە اقمولادا نەگىزگى نىسانداردىڭ اۋقىمدى قۇرىلىسى باستالىپ كەتتى. مەملەكەتتىك ورگانداردى ورنالاستىرۋ، تۇرعىن ۇيلەر سالۋ كەرەك بولدى. قالا ينفراقۇرىلىمى بويىنشا كوپتەگەن ماسەلەلەر شەشىلمەگەن. جولدار، كوممۋنيكاتسيا، ەنەرگەتيكا - ءبارى وتە ناشار كۇيدە بولعان.

«مەملەكەت باسشىسى اقمولادا تۇراقتى بولىپ تۇردى، قۇرىلىسقا تىكەلەي باسشىلىق جاسادى، ءاربىر جايدىڭ ەگجەي- تەگجەيىنە دەيىن ۇعىندى. پرەزيدەنتپەن قاتار جۇمىس ىستەۋ مەن ءۇشىن اسا زور كاسىبي ءارى ومىرلىك مەكتەپ بولدى. نۇرسۇلتان ءابىش ۇلى قارقىنعا قارقىن قوستى، ال ءبىز بار كۇشىمىزبەن ودان قالماۋعا تىرىستىق. كەدەرگىلەر مەن قيىندىقتار، ارينە ءاربىر قادام سايىن كەزدەستى. ونىڭ ۇستىنە، ولاردى - نىسانداردىڭ ەسكىلەرىن دە، جاڭادان قوسىلعاندارىن دا ەنەرگيامەن، تەلەفونمەن قامتاماسىز ەتۋ، كوممۋنيكاتسيا قۇبىرلارىن توسەۋ جانە باسقا تولىپ جاتقان مىندەتتەردى - قىسقا مەرزىم ىشىندە ەڭسەرۋ قاجەت بولدى» ، - دەيدى استانانىڭ العاشقى اكىمى.

سونىمەن بىرگە، ادىلبەك جاقسىبەكوۆ استانانىڭ ايازدى كۇندەرى جۇرگىزىلگەن قۇرىلىس جۇمىستارىن ەسكە الدى.

«تابيعاتتىڭ ءوزى دە اۋسەلەڭدى كورەيىن دەگەندەي سىناي ءتۇستى. 1996-1997 -جىلدارداعى قىس اسا سۋىق بولدى. الايدا سول ايازدارعا قاراماستان، جۇمىس ءبىر ءسات تە توقتاعان ەمەس. مىناداي ءبىر كورىنىس ويىمدا قالىپتى. تەمپەراتۋرا مينۋس 30- دان اسىپ كەتكەن، ونىڭ ۇستىنە قاتتى جەل. ءبارىمىز سالىنىپ جاتقان تۇرعىن ءۇيدىڭ جانىندا جەل ىزعارىنان ءبۇرىسىپ تۇرمىز. نۇرسۇلتان ءابىش ۇلى كەلدى، جان- جاعىنا قاراپ: قالاي- قالاي سوعادى، ءا! - دەدى. ءبىزدىڭ ءبارىمىز ءبۇرىسىپ: وي، ايتپاڭىز، ايتپاڭىز! - دەدىك. ال ول دىم بولماعانداي، ءبىزدىڭ ءسوزىمىزدى ەستىمەگەن سىڭاي تانىتىپ: قالىپتى جاعداي، بۇل جەرلەردە ۇنەمى جەل بولىپ تۇرادى، سوندىقتان اۋاسى دا تازا! - دەپ ءسوزىن جالعادى. وسى سوزدەردەن كەيىن ءبارىمىز دە جىلىنىپ سالا بەردىك، ءار جەردەن: سوعا بەرسىن، ءبارى دە جاقسى دەگەن داۋىستار شىعىپ جاتتى» ، - دەپ جازدى ادىلبەك جاقسىبەكوۆ.