بەيبىت شۇمەنوۆ جەكپە-جەگىن قايدان كورۋگە بولادى
بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە «Qazsport» تەلەارناسىنىڭ ديرەكتورى پاۆەل تسىبۋلين ايتتى، دەپ حابارلايدى قازاقپارات ءتىلشىسى.
«مەرەكە كۇندەرى «Qazaqstan» جانە «Qazsport» تەلەارنالارى ادەتتەگىدەي فۋتبولدان الەم چەمپيوناتىن تىكەلەي ەفيردەن كورسەتۋىن جالعاستىرادى. ونىڭ الدىندا ارنايى ستۋديالىق باعدارلاما شىعارىلىپ، وعان فۋتبولشىلاردى، جاتتىقتىرۋشىلاردى، بلوگەرلەردى، كينو اكتەرلەر مەن رەجيسسەرلەردى قوناققا شاقىرامىز»، - دەدى ول.
ونىڭ ايتۋىنشا، ەرتەڭ «ۇلى دالا رۋحى» فەستيۆال باستالادى. قىركۇيەك ايىنا دەيىن جالعاساتىن شارا ەلىمىزدىڭ بارلىق اۋماعىندا وتكىزىلەدى. فەستيۆالدىڭ رەسمي اشىلۋ ءراسىمى «قازمەديا ورتالىعىنىڭ» كينو-كونسەرت زالىندا وتەدى.
«7 -شىلدە كۇنى بارىس ارەنادا بەيبىت شۇمەنوۆتىڭ حيزني التىنكايامەن تيتۋلدىق جەكپە-جەگى وتەدى. بوكس كەشى اياسىندا 11 كەزدەسۋ بولادى. ونىڭ سەگىزىن تىكەلەي ەفيردەن كورسەتەمىز. تىكەلەي كورسەتىلىم «Qazaqstan» جانە «Qazsport» تەلەارنالارىندا ساعات 14:00-دە ءبىر مەزەتتە باستالادى. بەيبىتتىڭ جەكپە-جەگى جاقىنداعان كەزدە حالىقارالىق تاراتۋعا شىعىپ، سيگنالدى الەمنىڭ ءتۇرلى ەلدەرىنە بەرەمىز. جالپى، جەكپە-جەكتەر كەشكى ساعات 21:00-گە دەيىن جالعاسقانىمەن ءبىز 19-00-گە دەيىن عانا تىكەلەي ەفيردە بولامىز. سەبەبى ءبىزدىڭ فۋتبولدان الەم چەمپيوناتىن كورسەتۋ جونىندەگى حالىقارالىق مىندەتتەمەمىز بار. تىكەلەي ەفيرگە كىرمەي قالعان جەكپە-جەكتەردى فۋتبولدان كەيىن كورسەتەمىز. شارشى الاڭعا 11 قازاقستاندىق بوكسشى شىعادى جانە بارلىعى دا جەڭىسكە جەتەدى دەپ سەنەمىز»، - دەدى پاۆەل تسىبۋلين.
