شىمكەنت تۇرعىندارىنىڭ جالاقىسىن كوتەرۋگە تىرىسامىز - عابيدوللا ءابدىراحىموۆ

قالا اكىمى عابيدوللا ءابدىراحىموۆ قاراپايىم جۇمىسشىلاردىڭ جالاقىسىن دا كوتەرۋگە كۇش سالماقشى، دەپ حابارلايدى قازاقپارات ءتىلشىسى.

«بۇرىن شىمكەنت قالاسىنىڭ اپپاراتى وبلىستىق ماڭىزى بار قالانىڭ دەڭگەيىمەن جالاقى الىپ تۇردى. ەندى، رەسپۋبليكالىق مارتەبە بەرىلگەننەن كەيىن اكىمدىكتە جۇمىس ىستەيتىن قىزمەتكەرلەردىڭ كاتەگوريالارى جوعارىلايدى. سوعان قاراي جالاقىسى دا وسەتىن بولادى. جالاقىنىڭ كولەمى استانا مەن الماتىمەن بىردەي بولادى»، - دەدى ع. ءابدىراحىموۆ قازاقپارات تىلشىسىنە بەرگەن سۇحباتىندا.

اكىمنىڭ ايتۋىنشا، مارتەبەنىڭ رەسمي تۇردە كوتەرىلگەنىن ءاربىر قالا تۇرعىنى سەزىنۋى كەرەك.

«حالىق قازىرگى وزگەرىستەردى قىسقا ۋاقىتتىڭ ىشىندە كورۋى ءتيىس. سوندىقتان مەن قازىر كاسىپكەرلەرمەن سويلەسىپ، ءوز قىزمەتكەرلەرىنىڭ جالاقىسىن كوبەيتۋ مەن جاڭا جۇمىس ورىندارىن اشۋ جونىندە كەلىسسوزدەر جۇرگىزىپ جاتىرمىن. ولارعا «سەندەر دە جالاقى جۇيەلەرىڭدى قاراستىرىپ، جاقىن ارادا جۇمىسشىلاردىڭ ايلىعىن كوتەرۋ ماسەلەسىن شەشىڭدەر» دەپ ايتىپ وتىرمىن. سونىمەن قاتار، بىزدە ۇلكەن قۇرىلىس باستالايىن دەپ جاتىر. حايۆيل، BI Group، بازيس سياقتى كومپانيالار كەلىپ تۇرعىن ۇيلەر سالامىز دەپ وتىر. ال سالىناتىن قۇرىلىس كوبەيسە، جاڭا جۇمىس ورىندارى اشىلادى. مىقتى كومپانيالار كەلسە، ستاندارتتار دا كوتەرىلەدى. سوسىن قۇرىلىستىڭ توڭىرەگىندە شاعىن جانە ورتا بيزنەس داميدى دەپ ۇمىتتەنىپ وتىرمىز. مەنىڭ ويىمشا، بۇنىڭ بارلىعى ءبىر جىلدىڭ ىشىندە قالانىڭ دامۋىنا ۇلكەن سەرپىن بەرەدى. سونىڭ ءبارىن قاراپايىم حالىق سەزىنەتىن بولادى»، - دەپ اتاپ كورسەتتى ع. ءابدىراحىموۆ.

فوتو: i.ytimg.com