وتىراردا شاحانوۆتىڭ شىعارماشىلىق ءۇيى اشىلدى
اقىننىڭ تۋىپ-وسكەن شىلىك ەلدى مەكەنىندە بوي كوتەرگەن شىعارماشىلىق ءۇيى ءبىلىم مەن عىلىمنىڭ، ادەبيەت پەن ونەردىڭ ورداسىنا اينالماق، دەپ حابارلايدى قازاقپارات ءتىلشىسى.
ەرەكشە ديزاينمەن سالىنعان ءۇيدىڭ ءىشى دە وزگەشە بەزەندىرىلگەن. اقىننىڭ بالالىق شاعىنان بۇگىنگى كۇنگە دەيىنگى ءومىر جولى ءار كەزەڭدەگى سۋرەتتەرمەن، قۇجاتتارمەن تولىقتىرىلعان. شىعارماشىلىقپەن اينالىساتىن جۇمىس كابينەتتەرى، كىتاپحانا، دەمالىس جانە قوناق قابىلدايتىن بولمەلەر زامان تالابىنا ساي جابدىقتالعان.
عيماراتتىڭ اشىلۋ سالتاناتىندا وبلىس اكىمىنىڭ ورىنباسارى ەربول سادىر ءسوز سويلەپ، وبلىس اكىمى جانسەيىت تۇيمەبايەۆتىڭ اقىن اعاسىنا دەگەن ىستىق ىقىلاسقا تولى قۇتتىقتاۋىن جەتكىزدى.
يىعىنا زەرلى شاپان جاۋىپ، سىي-سياپات كورسەتتى. ەلباسىمىز ن. نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ نەگىزىندە «تۋعان جەرگە تاعزىم» اكسياسى اياسىندا وبلىس كولەمىندە كوپتەگەن يگى شارالار اتقارىلعانىن اتاپ ءوتتى. سولاردىڭ ءبىرى وسىناۋ اشىلىپ وتىرعان شاحانوۆ ءۇيىنىڭ بەلگىلى مەتسەنات سەرىكجان سەيىتجانوۆتىڭ دەمەۋشىلىگىمەن بوي كوتەرگەنىن جەتكىزدى.
مۇنان سوڭ الەم اقىنى مۇحتار شاحانوۆ ءسوز الىپ، ءوز ومىرىنەن ەستەلىكتەر ايتتى. اقىننىڭ تالانتىنا باس يەتىن ونەرپازدار ونىڭ جاڭا ولەڭدەرىن جاتقا وقىپ، اندەرىن اۋەلەتە شىرقادى. اشىلۋ سالتاناتىنان سوڭ جينالعان كوپشىلىك مۇحتار شاحانوۆتىڭ «وتىرار داستانى» شىعارماسىنىڭ جەلىسىمەن تۇسىرىلگەن انيماتسيالىق فيلمدى تاماشالادى.
