ەلباسى: وتكەن كۇندەر - قازاقستاندىقتاردىڭ وزگە ۇرپاعىندا قايتالانبايتىن ۋاقىت
ق ر پرەزيدەنتى تەلەراديوكەشەنى فەيسبۋكتەگى رەسمي پاراقشاسىندا ەلباسىمەن بولعان سۇحباتتان ۆيدەو ۇزىندى جاريالادى. وندا مەملەكەت باسشىسى وتكەن كۇندەردەن قالاتىن ەستەلىكتەر مەن ۋاقىتتىڭ نەلىكتەن زىمىراپ وتەتىنىنە قاتىستى وي- تولعامىمەن ءبولىستى.
«بۇل ومىردە بارلىعى زىمىراپ تەز وتەدى دەپ ايتامىز. سەبەبى ادام جادىندا وتكەن ءومىردىڭ تەك جارقىن ساتتەرى ساقتالادى. سوندىقتان ۋاقىت سىعىمدالادى. بولماشى دۇنيەلەر ۇمىتىلىپ، تاماشا اسەرلەر قالادى جانە ۋاقىت وتە قىسقا بولىپ كورىنەدى»، - دەدى پرەزيدەنت.
نۇرسۇلتان نازاربايەۆ قازاقستاندىقتاردىڭ اعا بۋىنى وزگە ۇرپاقتا قايتالانبايتىن ەرەكشە ۋاقىتتى باستان وتكەرگەنىن اتاپ ءوتتى.
«ءبىز جاستىق شاعىمىزدا الەمگە توڭكەرىلگەن دۇربىمەن قارايمىز. الدىمىزدا مىڭداعان جىلدار بار سەكىلدى كورىنەدى. ال كەيىن ۋاقىت جەتكەندە دۇرىس ءدۇربىنى قولعا الامىز. ارينە، از ءومىر سۇرمەدىك، تالاي جولدان وتتىك. ءبىر جاعىنان بۇل قيىن كەزەڭدەر بولدى. ەكىنشى جاعىنان، بۇل قازاقستاندىقتاردىڭ وزگە بۋىنىندا قايتالانبايتىن ەرەكشە ۋاقىتتار ەدى. مەن ءوز ەلىمنىڭ تاۋەلسىزدىگىنىڭ كۋاگەرى عانا بولىپ قويماي، ونىڭ ومىرگە كەلۋىنىڭ باسى- قاسىندا بولعانداردىڭ ءبىرى ەدىم. بۇل جەردە جالعان قاراپايىمدىلىققا سالىنباي- اق قويايىن. ارينە ۇزەڭگىلەستەرىم مەن حالقىممەن بىرگە قول جەتكىزدىم. سوندىقتان، وتكەن كۇندەر تۋرالى كەرەمەت اسەر بار، رازىلىق سەزىم بار جانە الدا تۇرعان ۇلكەن مىندەتتەر بار»، - دەپ ءوز ءسوزىن تۇيىندەدى پرەزيدەنت.
اۆتور: ايجان سەرىكجان قىزى
