استانانىڭ دامۋىنا سالىنعان مەملەكەت قارجىسى ارتىعىمەن قايتارىلدى - باقىتجان ساعىنتايەۆ
«استانا كۇنى ءبىر قالانىڭ عانا مەيرامى ەمەس، بۇكىل ەل بولىپ اتاپ وتەتىن جالپى حالىقتىق مەرەكە. سەبەبى قازاق ەلىنىڭ تاۋەلسىز مەملەكەت رەتىندە ورنىعۋى، سىناقتاردان سۇرىنبەي ءوتىپ، دامۋدىڭ داڭعىل جولىنا ءتۇسۋىنىڭ بارلىعى ەلىمىزدىڭ باس ورداسىمەن تىعىز بايلانىستى. باسىندا وزگە تۇگىلى ءوزىمىز كۇمانمەن قاراعان عاسىر جوباسى ەلباسىنىڭ ساياسي كورەگەندىگىمەن، ەرىك- جىگەرىنىڭ ارقاسىندا تابىستى جۇزەگە اسىپ، نەبارى 20 جىلدا ارقا تورىندە عاجايىپ قالا بوي كوتەردى. حالقىمىزدىڭ مىڭجىلدىق تالايلى تاعدىرى مەن اسقاق ارماندارىنان ءنار الىپ، سايىن دالادا ءساندى تالداي ءبۇر جارعان باس وردامىز از ۋاقىتتا ەل تىرەگى الىپ بايتەرەككە اينالدى»، - دەدى پرەمەر- مينيستر.
ۇكىمەت باسشىسى ەلوردا قاستەرلى تاۋەلسىزدىگىمىزدىڭ ۇلى تۇعىرى ەكەنىن، الاش جۇرتىنىڭ ايبارى، ەلباسىنىڭ ءتول پەرزەنتى ەكەنىن اتاپ ءوتتى.
«بۇگىندە ساياسي- ەكونوميكالىق قانا ەمەس، مادەني، رۋحاني جۇرەگى اتانعان ەلوردا قازاقستاننىڭ بارلىق وڭىرلەرىنىڭ باستى قوزعاۋشى كۇشى بولىپ، ايماقتاردىڭ دامۋىنا قۋاتتى سەرپىن بەرۋدە. 20 جىلدا قالانىڭ ەكونوميكاسى نومينالدى ەسەپتە 224 ەسەگە ارتىپ، 1997 -جىلعى 25,7 ميلليارد تەڭگەدەن 2018 -جىلى 5,7 تريلليون تەڭگەگە دەيىن كوبەيدى. قالاعا سالىنعان ينۆەستيتسيا جيىرما جىل بۇرىنعى 19,3 ميلليارد تەڭگەدەن 50 ەسەگە ارتىپ، بىلتىر رەكوردتىق 945 ميلليارد تەڭگە بولدى. ونداعى بيۋدجەتتەن تىس ينۆەستيتسيانىڭ ۇلەسى 80 پايىزعا جەتتى. 20 جىلدا استاناعا بيۋدجەتتەن 2,3 تريليون تەڭگە بولىنگەنىمەن، ول قازىرگە دەيىن ەل قازىناسىنا شامامەن 7 تريليون تەڭگە سالدى. ياعني قالانىڭ دامۋىنا سالىنعان مەملەكەتتىڭ قارجىسى ءۇش ەسە ارتىعىمەن قايتارىلدى. استانا حالقىنىڭ سانى جيىرما جىلدىڭ ىشىندە 3,5 ەسەگە ءوسىپ، 1 ميلليوننان استى»، - دەدى ب. ساعىنتايەۆ.
اۆتور: رۋسلان عابباسوۆ
