قازاقستاندىق «التىن ادامنىڭ» زەرگەرلىك بۇيىمدارى قىتايدا كورمەگە قويىلادى
دەپ حابارلايدى قازاقپارات ۇلتتىق مۋزەيدىڭ باسپا ءسوز قىزمەتىنە سىلتەمە جاساپ. كورمەنى ۇيىمداستىرۋشى - قازاقستان رەسپۋبليكاسىنىڭ ۇلتتىق مۋزەيى مەن شانشي تاريح مۋزەيى.
«التىن ادام» تۇسىنىگى تاريح عىلىمىندا اتاقتى ارحەولوگ عالىم، قازاقستاندىق ارحەولوگيانىڭ نەگىزىن قالاۋشىلاردىڭ ءبىرى كەمال اقىشيەۆتىڭ ارقاسىندا پايدا بولدى. تولىقتاي التىنان كيىم كيگەن ساق جاۋىنگەرى - ءبىرىنشى «التىن ادام» تابىلعان قازاقستاننىڭ وڭتۇستىگىندەگى ەسىك قورعانىندا زەرتتەۋ جۇرگىزگەن مىنە وسى كىسى بولاتىن. باعا جەتپەس قازىنا عاسىر جاڭالىعى رەتىندە تانىلىپ، شارتتى تۇردە «التىن ادام» دەپ اتالدى.
قورعاننان جاۋىنگەردىڭ كيىمىن ساندەگەن بارلىعى 4800 التىن بۇيىم تابىلعان بولاتىن. بۇل بۇرىن- سوڭدى تابىلعان قورعاندار ىشىندەگى مىسىر پەرعاۋىنى تۋتانحامون قابىرىنەن كەيىنگى ەڭ كوپ التىن اشەكەيلەر بولاتىن. قورىمداعى زاتتاردىڭ توپوگرافياسى: زەرتتەۋشىلەر جەرلەنگەن جاۋىنگەردىڭ سالتاناتتى ساۋىت- سايمانىن، تەمىر قىلىشى مەن قانجارىنىڭ قالدىقتارىن تەر توگىپ زەرتتەۋ ناتيجەسىندە ساق جاۋىنگەرىنىڭ كەلبەتىن جاڭادان جاساپ شىقتى.
«ەكسپوزيتسيالاناتىن كوللەكسيا تىزىمىندە XV عاسىردىڭ باسىنا ءتان دەپ بەلگىلەنگەن زەرگەرلىك ونەردىڭ بىرەگەي تۋىندىلارى، سول سياقتى ورتالىق قازاقستانداعى تالدى- Ⅱقورعانىنان تابىلعان جادىگەرلەر دە بار. 2012 -جىلعى ساۋىردە تاريح عىلىمدارىنىڭ دوكتورى، پروفەسسور م. سىزدىقوۆتىڭ باسشىلىعىمەن باتىس قازاقستان وبلىستىق تاريح جانە ارحەولگيا ورتالىعىنىڭ ارحەولوگيالىق وتريادى تەرەكتى اۋدانىنداعى تاقساي- 1 كەشەنىندە زەرتتەۋ جۇمىستارىن جۇرگىزىپ، ناتيجەسىندە تابىلعان اقسۇيەك سارمات ايەلى كيىمىنىڭ رەكونسترۋكتسياسى دا تانىستىرىلادى» دەلىنگەن حابارلامادا.
قازاقستان رەسپۋبليكاسى ۇلتتىق مۋزەيى قورلارىنان ۇسىنىلعان التىن زاتتاردىڭ از عانا بولىگى - ەۋرازيا دالا مادەنيەتى مۇراسىنىڭ وزىندىك ەرەكشەلىگىن كورسەتەتىن بۇرىنعىنىڭ اتاۋسىز شەبەرلەرىنىڭ تۋىندىلارى ولاردىڭ كوركەمونەر داستۇرلەرىنىڭ ۇزدىكسىزدىگىن تاعى دا ءبىر رەت دالەلدەيدى.
