بەيتانىس قىزعا بۇيرەگىن تەگىن بەرگەن ابزال شاڭىراق كوتەردى

الماتى. قازاقپارات - بەيتانىس قىزعا بۇيرەگىن تەگىن بەرگەن ورالدىق جىگىت ابزال ءادىلوۆ شاڭىراق كوتەردى.

قايىرىمدى جىگىت بولاشاق جارىن تۇركىستان وبلىسىنان تاپتى، دەپ حابارلايدى قازاقپارات ءتىلشىسى.

ءبىر بۇيرەگىن تانىمايتىن قىزعا تەگىن بەرگەن ابزال ءادىلوۆ 2017 -جىلدان بەرى الەۋمەتتىك جەلىدە تانىمال بولىپ كەتتى.

قاراپايىم وتباسىدان شىققان ورالدىق جىگىت تۇركىستان وبلىسىنىڭ تۇرعىنى ءجاميلا بايسەرىكوۆانىڭ باسىنداعى قيىن جاعدايدى ەستىپ، كومەك قولىن سوزۋعا بەل بۋادى. جىگىت ناۋقاستان اقشا سۇراماي، ءبىر بۇيرەگىن بەرۋگە كەلىسەدى.

ءجاميلا مەن ابزال 2017 -جىلدىڭ قاراشاسىندا بۇيرەك اۋىستىرۋ ءۇشىن وتاعا تۇسكەن ەدى. بىرنەشە ساعاتقا سوزىلعان وپەراتسيا ءساتتى وتكەن. 5 كۇننەن سوڭ ابزال مەن ءجاميلا جانە ءجاميلانىڭ اناسى قۇرمانگۇل شىمكەنتكە كەتكەن بولاتىن.

جاس جىگىت ءوزىنىڭ ماحابباتىن شىمكەنتتە ءجۇرىپ جولىقتىرعان ەكەن.

«شىمكەنتتە جۇرگەندە الەۋمەتتىك جەلى ارقىلى ايگەرىم دەگەن قىزبەن تانىستىم. ول ءوزى مەنىڭ وقيعامدى ەستىپ بىلگەن سوڭ ماعان جازعان. 1-2 اپتاداي سويلەسىپ، كەزدەسىپ جۇردىك. كەيىن ءبىر-ءبىرىمىزدى ۇناتىپ قالدىق. مەن ايگەرىمدى ورال جاققا الىپ كەتتىم. اتا-انام كەلىن اپارا جاتقانىمدى ەستىگەندە سەنبەدى. جارىم ايگەرىم ورداباسى اۋدانى، تەمىرلان اۋىلىنىڭ قىزى»، - دەدى ابزال ءادىلوۆ.

قازىر جاس وتباسى ورالدا تۇرىپ جاتىر. ايگەرىم - بالاباقشادا تاربيەشىنىڭ كومەكشىسى بولىپ جۇمىس ىستەيدى. ابزال «كۆانت» ج ش س-دا قىزمەت ەتەدى.

شىلدەنىڭ 8 ىندە ابزال مەن ايگەرىمنىڭ تويى جوسپارلانعان. ابزال قۋانىش تويىنا ءجاميلا مەن ونىڭ اناسىن دا شاقىرعان.

الايدا، دەنساۋلىعىنىڭ السىزدىگىنە بايلانىستى ءجاميلا مەن اناسى تويعا كەلە المايتىن بولىپتى.