قايرات كەلىمبەتوۆ جاقسى جاڭالىقپەن ءبولىستى

استانا. قازاقپارات - «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ دايىندىق جۇمىستارى جايىندا ايتىپ بەردى.

5 -شىلدە كۇنى ورتالىقتىڭ رەسمي اشىلۋى وتەدى، دەپ حابارلايدى قازاقپارات ءتىلشىسى.

«ەستەرىڭىزدە بولسا، وتكەن اپتادا مەن 1 -شىلدەگە دەيىن 50 گە جۋىق كومپانيانىڭ تىركەلەتىنى جايىندا ايتقان ەدىم. بۇگىن جاقسى جاڭالىقپەن بولىسكىم كەلىپ وتىر. وسى ۋاقىتقا دەيىن 55 كومپانيا تىركەلىپ ۇلگەردى. جىلدىڭ اياعىنا دەيىن 100 كومپانيا تىركەلەدى دەگەن جوسپار بار. دەمەك، جوسپاردىڭ جارتىسى ورىندالدى. الەمدىك قارجى ۇيىمدارى تاراپىنان قىزىعۋشىلىق بار»، - دەدى ق. كەلىمبەتوۆ ۇكىمەت ۇيىندە وتكەنت باسپا ءسوز ءماسليحاتىندا.

ونىڭ ايتۋىنشا، 2020 -جىلعا دەيىنگى جوسپار - «استانا» حالىقارالىق قارجى ورتالىعىندا 550-دەن استام كومپانيانى تىركەۋ. ال وسى ۋاقىتقا دەيىن تىركەلگەن كومپانيالاردىڭ ىشىندە اقش، قىتاي مەن ۇلىبريتانيانىڭ وكىلدەرى، سونداي-اق، قىتايدىڭ ۇكىمەتتىك دامۋ بانكى بار. قارجىلىق تەحنولوگيالار بويىنشا تىركەۋگە تۇرعان كومپانيالار دا از ەمەس. ولار - رەسەي، تايلاند، نيگەريا، افريكا مەملەكەتتەرى مەن شۆەيساريانىڭ وكىلدەرى. اتالعان كومپانيالار جاڭا تولەم قۇرالدارى، بانكينگ جانە تاعى باسقا قىزمەتتەر بويىنشا جۇمىس ىستەۋگە دايار.

بۇدان بولەك، قارجى ورتالىعىنىڭ بيرجاسىنا كەلگەن بروكەرلىك كومپانيالار دا بار. بيرجانىڭ باسقارما ءتوراعاسىنىڭ ورىنباسارى ءامينا تۇرعىلوۆانىڭ سوزىنە قاراعاندا، وسى اپتادا ءبىرقاتار بروكەرلىك كومپانيالارعا ارنايى كۋالىكتەر تاپسىرىلادى.