قازاقستاندا مي ىسىگى وتاسىز ەمدەلەدى

استانا. قازاقپارات - قازاقستاندا مي ىسىگىن راديوساۋلەلەرمەن - وتاسىز ەمدەۋ ءادىسى قولعا الىنباق. حالىق مۇنداي تەحنولوگيامەن تەگىن ەمدەلەتىن بولادى، دەپ حابارلايدى قازاقپارات ءتىلشىسى.

ۇلتتىق نەيروحيرۋرگيا ورتالىعىنىڭ باسشىسى سەرىك اقشولاقوۆتىڭ ايتۋىنشا، جاڭا اپپاراتتىڭ اتاۋى - "Gamma Knifе"، ياعني «گامما- پىشاق». ونىڭ كومەگىمەن ميداعى كىشىگىرىم ىسىكتەردى وتاسىز جويۋعا بولادى.

«راديوحيرۋرگيالىق ادىسپەن ەمدەۋ - بۇل سوڭعى تەحنولوگيالاردىڭ ءبىرى. ونىمەن كىشىگىرىم ىسىكتەردى، سونداي- اق قان تامىرىنىڭ اقاۋلارىن ساۋلەمەن 20-40 مينۋتتىڭ ىشىندە ەمدەپ شىعۋعا بولادى. ول اپپاراتتىڭ اقشاسى تولەنگەننەن كەيىن كەلەسى جىلى بىزگە جەتكىزىلەدى. قازاقستان ورتالىق ازيا بويىنشا اتالعان تەحنولوگيانى ءبىرىنشى بولىپ قولعا الماقشى. وسى اپپاراتۋرانى الامىز دەگەنىمىزگە ءبىر جىلدان اسىپ كەتتى. سول سەبەپتى جاستاردى ەكى- ءۇش جەردە دايىنداپ جاتىرمىز. الدى رەسەيدە، ۆەنگريا مەن فرانسيادا وقىپ كەلگەندەر بار»، - دەيدى س. اقشولاقوۆ.

ونىڭ ايتۋىنشا، ءدال قازىر قازاقستاندىقتار جاڭا تەحنولوگيامەن ەمدەلۋ ءۇشىن شەتەلگە بارىپ ءجۇر. وعان ءبىراز اقشا كەتەدى. ءبىر ادامعا شامامەن 20-50 مىڭ ەۋرو قاجەت.

«ال اپپارات كەلگەننەن كەيىن ءبارىن ءوزىمىز جاسايمىز. بارلىق شارالار مەملەكەتتىك كۆوتا بويىنشا جاسالادى. بۇل دەگەنىمىز، حالىق ءۇشىن تەگىن بولادى»، - دەپ اتاپ كورسەتتى س. اقشولاقوۆ.

ايتا كەتەيىك، بيىل ۇلتتىق نەيروحيرۋرگيا ورتالىعىنىڭ قۇرىلۋىنا 10 جىل تولىپ وتىر. وسى ۋاقىتتىڭ ىشىندە اتالعان مەكەمەدە 20 مىڭنان استام وتا جاسالدى. سونىڭ 70 پروتسەنتى بۇرىن شەتەلدە عانا جاسالاتىن. ورتالىقتا جىل سايىن 4 مىڭعا جۋىق ادام ەمدەلەدى. بۇگىن ۇلتتىق نەيروحيرۋرگيا ورتالىعىنىڭ مەرەيتويى اياسىندا ق ر نەيروحيرۋرگتارىنىڭ IV كونگرەسى باستالدى.

اۆتور: ارمان اسقاروۆ