دومبىرا كۇنى كونسەرت ەمەس، ۇلتتىق اسپاپتى زەرتتەۋ جۇمىستارى ماڭىزدى - شەبەر

اقتوبە. قازاقپارات - ۇلتتتىق دومبىرا كۇنى اقتوبەلىك شەبەرلەر دومبىرا جاساۋ جولدارىن قالا تۇرعىندارىنا كورسەتتى. شەبەر ەرقوساي ءابىلوۆ دومبىرا كۇنىندە كونسەرتتەر ۇيىمداستىرۋدى ازايتىپ، زەرتتەۋ جۇمىستارىنا كوپ كوڭىل ءبولۋ كەرەك دەپ ەسەپتەيدى، دەپ حابارلايدى قازاقپارات ءتىلشىسى.

ەلىمىزدەگى دومبىرا جاسايتىن حاس شەبەرلەردىڭ ءبىرى ەرقوساي ءابىلوۆ بيىل ۇلتتىق دومبىرا كۇنىنە دايىندىقتىڭ تىم از بولعانىن، كەلەر جىلى كونسەرتتىك باعدارلامالارعا ەمەس، زەرتتەۋ جۇمىستارىنا كوپ كوڭىل ءبولىنۋى قاجەت ەكەنىن ايتىپ بەردى.

«ءبىر اي دايىندالىپ، جۇزدەگەن ءىس- شارا ۇيىمداستىرىلدى. ەگەر ءبىر جىل بويى دايىندىق جۇرگىزسەك، كەرەمەت بولار ەدى. بۇل كۇنى كونسەرت قويىپ، توي- دۋمان ۇيىمداستىرىپ قويماي، زەرتتەۋگە كوپ كوڭىل ءبولۋ قاجەت. شەبەرلەرگە دە جاعداي جاساعان دۇرىس. جۇمەكەن ناجىمەدەنوۆتىڭ «دومبىرانىڭ قوڭىر ءۇنى» دەگەن كىتابى بار. سول كىتاپتا زەرتتەۋ جۇمىستارى جان- جاقتى جازىلعان. زەرتتەۋشى «دومبىرانىڭ ىشەگىن دايىندايتىن شەبەر بولار ما ەكەن» دەپ ءوز ويىن قالدىرعان. مەن جاسايمىن، الماتىلىقتار تاپسىرىسپەن الادى. ءبىراق جالعىز ءوزىم بارىنە ۇلگەرمەيمىن. زەرگەرلىك، بەس قارۋ، ساۋىت، دومبىرا جاساپ جۇرگەندە ىشەك جاساۋعا ۋاقىت بولماي قالادى. ىشەك جاساۋدى دامىتىپ، دومبىراعا ەسكەرتكىش قويۋعا كەڭەس بەرەر ەدىم»، - دەدى شەبەر ەلقوساي ءابىلوۆ.

ايتا كەتەيىك، شەبەر اقتوبە وبلىسىنىڭ مارتوك اۋدانى ەسكەرتكىش قويۋعا ىڭعايلى تاريحي ورىن دەپ ەسەپتەيدى. سەبەبى، «اقساق قۇلان» كۇيى قۇرىپ بارا جاتقاندا كۇيشى قامبار مەدەتوۆ ونى قايتا ومىرگە اكەلدى. بۇل مارتوكتە بولعان وقيعا، ەسكەرتكىشتى سول اۋدانعا قويۋ تۋرالى ۇسىنىستىڭ ءمانى وسىندا جاتىر.

«ءبىر جىلدان سوڭ ەسكەرتكىشتىڭ اشىلۋىن تاماشالاساق جاقسى بولار ەدى. ءوزىم دومبىرانىڭ ويۋ- ورنەگىنە ارنالعان كىتاپ دايىنداپ قويدىم. كىتابىم قارجى تاپشىلىعىنان شىقپاي قالدى. ەگەر مەملەكەتتەن قولداۋ بولسا شەبەرلەر دە دومبىرا جاساۋ جولدارىن ساقتاپ قالۋعا بار كۇشىن سالار ەدى. ماسەلەن، «ورتەكە» كونكۋرسىنىڭ ەكى جەڭىمپازى اقتوبەلىك. ءبىرى ابدۋلحاميت رايىمبەرگەنوۆ، ەكىنشىسى كۇيشى باقىت باسىعارايەۆ. ناتيجەنى قوسىپ، «ورتەكە» ورىنداۋشىلارى جانە «ورتەكە» شەبەرلەرى» دەپ كىتاپ جازۋ ويدا بار. تاريحتى زەرتتەپ، اقپاراتتار جيناقتالىپ جاتىر. بارىنە قارجى كەرەك»، - دەدى شەبەر.

ايتا كەتەيىك، شەبەر ەرقوساي ءابىلوۆ دومبىرانىڭ قوس ىشەگىن جاساۋدى 12 جىل بويى زەرتتەپ، ساپالى ىشەك دايىنداپ شىقتى. كەيبىرى دومبىرا ىشەگىن 6 اي بويى كۇتىپ ءجۇر.

«تەحنولوگياسى بار، ءبىراق كىتاپ بولىپ شىقپادى. كۇيشى ابدۋلحاميت رايىمبەرگەنوۆپەن بىرگە سىناقتان وتكىزگەن ەدىك. ىشەك جاساۋدى ۋاقىتپەن ساناسپاي جاساۋ كەرەك. بارىنە قارجى تاپشىلىعى قولبايلاۋ بولىپ تۇر»، - دەدى ەرقوساي ءابىلوۆ.

اۆتور: التىناي ساعىندىقوۆا