تۋبەركۋلەزگە قارسى جاڭا پرەپاراتتار تەگىن بەرىلەدى

استانا. قازاقپارات - تۋبەركۋلەزگە قارسى دارىلەردىڭ ءبارى تىكەلەي دۇنيەجۇزىلىك دەنساۋلىق ساقتاۋ ۇيىمى ارقىلى جەتكىزىلەدى، دەپ حابارلايدى قازاقپارات ءتىلشىسى.

ق ر دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا، كەلەسى جىلعا ارنالعان تەگىن ءدارى- دارمەكتەردىڭ ءتىزىمى كوپ وزگەرگەن جوق. ءبىراق وعان تۋبەركۋلەزگە قارسى يننوۆاتسيالىق پرەپاراتتار ەندى.

«ول ەم- دومنىڭ تيىمدىلىگى 90 پروتسەنت دەيدى. اسىرەسە، انتيبيوتيككە بەيىم تۋبەركۋلەزگە قارسى اسەرى قاتتى. ءبىز اتالعان پرەپاراتتاردى كوپتەن بەرى الا الماي جۇرگەنبىز. بۇعان دەيىن تۋبەركۋلەزدىڭ اۋىر فورماسى بار ناۋقاستارعا حالىقارالىق ۇيىمدار كومەكتەسىپ كەلدى. سونىڭ وزىندە تەك ءاربىر بەسىنشى ناۋقاسقا عانا ونداي ءدارى بەرىلدى. قازاقستاندا ونداي ەم-دوم ءالى تىركەلمەگەن. الايدا ءبىز ونى تىكەلەي دۇنيەجۇزى دەنساۋلىق ساقتاۋ ۇيىمىنىڭ ارقىلى ساتىپ الاتىن بولامىز. وسىلايشا، كەلەسى جىلى ءبىز اۋىر ناۋقاستاردىڭ بارلىعىن جاڭا پرەپاراتپەن قامتاماسىز ەتە الامىز»، - دەدى ە. ءبىرتانوۆ حالىق الدىندا ەسەپ بەرۋ كەزدەسۋى كەزىندە.

ءمينيستردىڭ ايتۋىنشا، كەلەسى ايدا بيۋدجەتتىڭ ەسەبىنەن تەگىن ءدارى-دارمەكتەردى ساتىپ الۋ ناۋقانى باستالادى. كۇزدە بارلىق كەلىسىمشارتتار راسىمدەلەدى دەگەن جوسپار بار. ال جەلتوقسان ايىندا ءدارىحانالار مەن ەمحانالارعا تاراتىلادى. سول جەردەن كەلەسى جىلى قاڭتار ايىندا ناۋقاستارعا بەرىلەدى.

ايتا كەتەيىك، بۇگىنگى كەزدەسۋ كەزىندە مينيستر فاست- فۋدتى شەكتەۋگە قاتىستى پىكىر ءبىلدىردى. بۇدان بولەك، استاناداعى پەرزەنتحانادا انالارىنان ايىرىلعان ەكى نارەستەنىڭ جاعدايى جايىندا ايتىپ بەردى. جەدەل جاردەم ماسەلەسى دە ءسوز بولدى. ءمينيستردىڭ ويىنشا، جاساندى ۇرىقتاندىرۋدى بيۋدجەت ەسەبىنەن قارجىلاندىرعان دۇرىس ەمەس.