سەمەيگە ابايدىڭ ءۇش ىشەكتى تۇمار دومبىراسى اكەلىندى
كورمە سەمەيدەگى اباي مۋزەيىندە 1 - شىلدە - ۇلتتىق دومبىرا كۇنىنە وراي اشىلدى. مۇندا مۋزەي قورىندا بار 30 عا جۋىق دومبىرا قويىلدى. ولاردىڭ اراسىندا ابايدىڭ ءۇش ىشەكتى تۇمار دومبىراسى، ابايدىڭ شاكىرتتەرىنىڭ جانە وڭىرىمىزگە تانىمال كۇيشىلەردىڭ دومبىرالارى بار.
ايتا كەتەيىك، جيدەباي اۋىلىنداعى مۋزەي ۇيىندە تۇرعان ابايدىڭ ءۇش ىشەكتى تۇمار دومبىراسى كورمەگە ارنايى اكەلىنگەن. 1885 -جىلى ابايدىڭ سەمەيدەگى ورىس دوستارىنىڭ ءبىرى نيفونت دولگوپولوۆ جاز ايلارىندا شىڭعىستاۋ ايماعىندا بولىپ قايتادى. اباي اۋىلىنان قايتىپ كەلگەننەن كەيىن سەمەيدەگى ولكە تانۋ مۋزەيىنە (1883 -جىلى اشىلعان) ابايدىڭ ءۇش ىشەكتى تۇمار دومبىراسىن، قوبىزىن، سىبىزعىنى، اساتاياق سىندى قازاقتىڭ كونە مۋزىكالىق اسپاپتارىن وتكىزەدى. دومبىرا بۇگىنگى كۇنى ابايدىڭ ساۋساعىنىڭ تابى قالعان قۇندى جادىگەر. تۇمار دومبىرادا اقىننىڭ وزىنەن بولەك اباي ونەر مەكتەبىنىڭ شاكىرتتەرى دە ويناعان.
«ابايدىڭ ەكى دومبىراسىنىڭ ءبىرى ونىڭ نەمەرەسى يسرايل اقىلبايەۆتىڭ قولىندا بولعان. 1981 -جىلى ىقىلاس اتىنداعى حالىق مۋزىكالىق اسپاپتار مۋزەيى اشىلعان ۋاقىتتا سوندا ارنايى بەرىلگەن. ودان كەيىن ابايدىڭ ءوزى 1885 -جىلى ءوزىنىڭ دوسى نيفونت دولگوپولوۆ ارقىلى ولكە تانۋ مۋزەيىنە وتكىزگەن تۇمار دومبىراسى. بۇل تۇمار دومبىرا كوپ ۋاقىت جيدەبايداعى مۋزەيدە تۇردى. ۇلتتىق دومبىرا مەرەكەسى قارساڭىندا قالا تۇرعىندارىنا كورسەتۋ ماقساتىندا ارنايى الىپ كەلدىك. ازداعان جاڭعىرتۋ جۇمىستارى جۇرگىزىلىپ، كورمەگە قويىپ وتىرمىز» ، - دەدى اباي مۋزەيى ديرەكتورىنىڭ ورىنباسارى
مەيرامگۇل قايرامبايەۆا
