تانىمال فرانسۋز اكتريساسى «وسكار» يەگەرى قازاق اقىنىنىڭ ولەڭدەرىن وقىپ بەردى
«تانىمال فرانسۋز اكتريساسى ءبىزدىڭ ەلوردانى 20 جىلدىعىمەن قۇتتىقتاۋ ءۇشىن كەلدى. سونىمەن قاتار فەستيۆال اياسىندا مونوسپەتاكلمەن ونەر كورسەتتى. اتاپ ايتقاندا، جيۋلەت بينوش قازاق اقىنى قاسىم امانجولوۆتىڭ «ولەڭ تۋرالى» جانە «سارىارقا» ولەڭدەرىن وقىپ بەرىپ، جينالعان جۇرتشىلىقتى تاڭعالدىردى. جالپى، وسى جايت فرانسۋز اكتريساسى مەن قازاق اقىنىنىڭ شىعارماشىلىعىن قۇرمەتتەيتىن ادامدار ءۇشىن توسىن سىي بولدى»، - دەپ جازدى مادەنيەت جانە سپورت ءمينيسترى ارىستانبەك مۇحامەدي ۇلى Facebook-تەگى پاراقشاسىندا.
جيۋلەت بينوش ءوز سوزىندە قازاقستان تۋرالى پوزيتيۆتى اسەر العانىن، سونىمەن قاتار ۇلى دالانىڭ كەڭىستىگى مەن استانانىڭ قارقىندى ساۋلەتتىك يدەياسى تاڭعالدىرعانىن اتاپ وتكەن.
«اكتريسا قازاقستان حالقىنىڭ اق پەيىل نيەتىنە قۋانعانىن جەتكىزىپ، ۇزاق مەرزىمگە ءبىزدىڭ ەلگە تاعى دا ساپارلاپ كەلۋدى جوسپارلاپ وتىرعانىن ايتتى. سونىمەن قاتار جيۋلەت بينوش ءبىزدىڭ وتانداسىمىز سامال ەسلياموۆانىڭ ۇلكەن جەتىستىگى ءۇشىن قۋانىشتى ەكەنىن اتاپ ءوتتى»، - دەپ قوستى ا. مۇحامەدي ۇلى.
ءمينيستردىڭ سوزىنە قاراعاندا، دۇنيەجۇزىلىك تەاتر فەستيۆالى اياسىندا استانانى 20 جىلدىق مەرەيتويىمەن قۇتتىقتاۋ ءۇشىن يتاليا، ۇلىبريتانيا، ليتۆا، پولشا، گەرمانيا ەلدەرىنەن تانىمال الەمدىك تەاترلار كەلدى. جالپى، ءتۇرلى ەلدەردەن ساپارلاپ كەلگەن 17 تەاتر اتاقتى سپەكتاكلدەردى ۇسىندى.
«استانا» II دۇنيەجۇزىلىك تەاتر فەستيۆالىنىڭ جابىلۋ سالتاناتىنا «وسكار» سىيلىعىنىڭ يەگەرى، فرانسۋز اكتريساسى جيۋلەت بينوش كەلەتىنىن بۇعان دەيىن جازعان ەدىك.
اۆتور: رۋسلان عابباسوۆ
