ش ق و- دا دومبىراعا ەسكەرتكىش ورناتىلدى
بيىل ەلىمىز بويىنشا تۇڭعىش رەت تويلاناتىن ۇلتتىق دومبىرا كۇنىن جارما اۋدانى اۋقىمدى مادەني شارامەن باستاپ كەتتى. اۋدان ورتالىعى - قالباتاۋ اۋىلىنىڭ دوستىق كوشەسىنەن تۇعىر تاپقان ەڭسەلى ەسكەرتكىشتىڭ اۆتورى - جاس ءمۇسىنشى نۇربول قاليەۆ.
«ەسكەرتكىشكە تاپسىرىس اياق استىنان ءتۇستى. قىسقا مەرزىمنىڭ ۇشىندە 3 نۇسقاسىن دايىندادىق. سونىڭ ىشىندە كيەلى ەمەن اعاشىن جارىپ شىققان مۇسىنگە تاڭداۋ ءتۇستى. قازاق شەجىرەسىن دە اعاشتىڭ تامىرىنداي ەتىپ تاراتادى. ەمەندى سوندىقتان تاڭدادىق» - دەيدى ەسكەرتكىش اۆتورى.
سالتاناتتى شارادا ءسوز العان اۋدان اكىمى نۇرلان سىدىقوۆ ەسكەرتكىش اۋماعىن ۇلتتىق مۇرانى دارىپتەپ، ونەر قۇدىرەتىن ناسيحاتتايتىن ورىنعا اينالدىرۋعا كۇش سالاتىنىن اتادى.
«ءبىزدىڭ زامانىمىزدىڭ V عاسىرىندا جاسالعان قۇدىرەتتى قارا دومبىرانىڭ التاي تاۋىنان تابىلۋى الەمدەگى شەرتپە اسپاپتاردىڭ اتاسى - قوس ىشەكتى دومبىرا ەكەنىن كورسەتەدى. بۇل ەسكەرتكىشتى قازاق دالاسىنان دومبىرا ءۇنى ۇزىلمەسىن دەگەن تىلەكپەن ورناتتىق» - دەدى اۋدان اكىمى.
ەسكەرتكىشتىڭ بيىكتىگى - 7 مەتر، ەنى - 3 مەتر.
مىڭنان استام ادامنىڭ قاتىسۋىمەن وتكەن مەرەكەلىك شارادا تانىمال كۇيشى- كومپوزيتور ايبەك بەكبوسىنوۆ «ەلباسى تولعاۋى»، «ماڭگىلىك»، «تارباعاتاي» سياقتى اۆتورلىق كۇيلەرىن ورىندادى.
