شۇمەنوۆ استاناداعى بوكس كەشىن ۇيىمداستىرۋداعى قارجىلىق قيىندىقتاردى ايتتى
بۇل تۋرالى تىلشىلەرگە قازاقستاندىق بوكسشى بەيبىت شۇمەنوۆ ءمالىم ەتتى، دەپ حابارلايدى قازاقپارات ءتىلشىسى.
WBA ديرەكتورلار كەڭەسى شۇمەنوۆتىڭ بوكس كەشى اياسىندا 1-3- شىلدە ارالىعىندا وتپەك. قازاقستان كاسىپقوي بوكس فەدەراتسياسى ۆكونتاكتە جەلىسىندە حابارلاعانداي، ونى ۇيىمداستىرۋدا ەكى سالماق ساناتى بويىنشا قازاقستاننان شىققان تۇڭعىش ءارى جالعىز الەم چەمپيونى كوپتەگەن كەدەرگىلەرگە تاپ بولۋدا. بوكسشى كوپتەگەن جۇلدىزداردىڭ ەلورداعا كەلۋگە ۋادەسىن العان. ءبىراق مينيسترلىك تاراپىنان قارجىلاندىرۋدىڭ كەشىكتىرىلۋىنەن ماسەلە قيىندىقتارعا تىرەلۋدە. ال بوكس كەشىنىڭ وتۋىنە از ۋاقىت قالىپ وتىر.
ايتا كەتەرلىگى، 7- شىلدە كۇنى استانادا كاسىپقوي بوكس كەشى وتەتىنى جوسپارلانعان. كەش اياسىنداعى باستى جەكپە-جەك بەيبىت شۇمەنوۆ (17-2، 11ك و) پەن تۇرىك بوكسشىسى حيزني التۋنكايدىڭ (30-1، 17ك و) اراسىندا بولادى. ولار WBA نۇسقاسى بويىنشا ءبىرىنشى اۋىر سالماقتاعى الەم چەمپيونى تيتۋلىن ساراپقا سالادى.
بەيبىت شۇمەنوۆتىڭ ايتۋىنا قاراعاندا، بوكس جۇلدىزدارىنىڭ بارلىعىنا شاقىرتۋ جولدانعان.
«ماسەلەن، جان پاسكال، لۋچيان بۋتە، حۋان مانۋەل ماركەس، ەريك مورالەس، ماركو انتونيو باررەرا، حۋليو سەزار چاۆەس - بۇگىنگى دەيىن كەلەتىندەرىن راستاعان بوكسشىلار. سونىمەن بىرگە، مەنىڭ دوستارىم حورحە لينارەس پەن دەۆيد حەي دا كەلگەلى وتىر. ءبىراق، قارجىلىق تۇرعىدا قيىندىقتار پايدا بولدى. مادەنيەت جانە سپورت مينيسترلىگى كونۆەنتسيانى تولىعىمەن وزدەرىنە الاتىنىن ايتقان ەدى. ءبىراق سوڭىندا قارجىلاندىرۋ جاعىنان ازداپ كەشۋىلدەپ جاتىرمىز. بيلەتتەردىڭ باعاسى قىمبات. بارلىعىن دا الىپ كەلۋ ءۇشىن 200 مىڭ دوللار كەرەك»، - دەيدى بوكسشى.
شۇمەنوۆتىڭ سوزىنە سەنسەك، ايگىلى ءانشى 50 Cent اتالعان شاراعا ءوزى قىزىعۋشىلىق تانىتقان.
«ءبىراق، كەيىن ونىڭ اگەنتتەرى بىزگە شىعىپ، تىم كوپ سومانى سۇراي باستادى. البەتتە، ءبىز بىردەن باس تارتتىق. ءبىراق، مەنىڭ دوسىم جان پاسكال 50 Cent-پەن جاقىن ارالاسادى. 50 Cent كەلۋىن كەلگىسى كەلەدى-اق، ماسەلە ولاردىڭ اگەنتتەرىندە بولىپ وتىر. قازاقستان مۇنداي ورىنداۋشىلارعا وتە كوپ اقشا تولەيدى، سوندىقتان شەتەلدىكتەر كەيدە جۇلدىزدارى ارقىلى امەريكاداعىدان دا زور تابىس تاپقىسى كەلەدى. سول سەبەپتى اگەنتتەر قولدان كەدەرگى جاساپ وتىر. قىسقاسى، روي دجونستىڭ دا «جىرى» وسى. مەن ونى دوسىم ءاليحان جارىلعاپوۆ ارقىلى شاقىردىم. ول: «بەيبىتكە ايت، قازاقستانعا قۋانا-قۋانا بارامىن» دەپتى. ودان كەيىن روي دجونستىڭ اگەنتتەرى: «وعان نەلىكتەن تىكەلەي بايلانىساسىز؟ سىزدەر ءبىز ارقىلى بايلانىسۋىڭىز كەرەك. قانشا اقشا تولەۋگە دايىنسىز؟» دەپ شىعا كەلدى. سوندىقتان، اشىعىن ايتايىن - اتالعان جۇلدىزداردىڭ كەلەتىنىنە جاۋاپ بەرە المايمىن»، - دەدى ول.
