نۇرلان نىعماتۋلين پارلامەنتتىڭ جاڭا ءتورتىنشى سەسسيادا اتقاراتىن جۇمىستارىمەن ءبولىستى
«الدىمىزدا ءالى دە تالقىلاناتىن ماسەلەلەر، قابىلداناتىن زاڭدار، بىرلەسىپ اتقاراتىن شارالار وتە كوپ. وسىعان وراي كەلەسى ءتورتىنشى سەسسيادا پارلامەنت ەلباسىنىڭ جولداۋى مەن بەس الەۋمەتتىك باستامانى ىسكە اسىرۋعا ارنالعان جۇمىستاردى ودان ارى جالعاستىراتىن بولادى. دەپۋتاتتىق كورپۋس ۇكىمەتپەن تىڭىز بايلانىس جاساي وتىرىپ، وتاندىق ەكونوميكانى كۇشەيتۋگە، كاسىپكەرلەردى قولداۋعا، الەۋمەتتىك كەپىلدىكتەردى ساقتاۋعا، ەلىمىزدى ودان ارى قاراي نىعايتۋعا جانە دەموكراتيانى دامىتۋعا باعىتتالعان زاڭ قابىلدايتىن بولادى»، - دەدى ن. نىعماتۋلين.
قازىرگى ۋاقىتتا پارلامەنت قاراۋىندا 45 زاڭ جوباسى بار. ولاردىڭ قاتارىندا ارنايى ەكونوميكالىق جانە يندۋستريالدىق ايماقتار تۋرالى، مەملەكەتتىك ستاتيستيكا، مەملەكەتتىك ساتىپ الۋ ماسەلەلەرى جونىندەگى، سونداي-اق اگروونەركاسىپتىك كەشەنىن رەتتەۋ، كينەماتوگرافيا تۋرالى زاڭ جوبالارى وتە ماڭىزدى بولىپ وتىر.
«الداعى ءتورتىنشى سەسسيادا جۇمىسپەن قامتۋ سالاسىنىڭ پروبلەمالارى مەن دامۋ پەرسپەكتيۆالارى، قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ بارىسى سياقتى ماڭىزدى ماسەلەلەر بويىنشا پارلامەنتتىك تىڭداۋلار وتكىزۋ جوسپارلانعان. جاڭا سەسسيا باستالعاننان كەيىن قازان ايىندا استانادا «ينۆەستيتسيا جاستارعا» دەگەن حالىقارالىق كونفەرەنتسيا ۇيىمداستىرۋعا باستاماشى بولامىز»، - دەدى ءماجىلىس ءتوراعاسى.
ايتا كەتەيىك، بۇگىن پارلامەنت پالاتالارىنىڭ بىرلەسكەن وتىرىسى ءوتىپ، التىنشى سايلانعان پارلامەنت ءۇشىنشى سەسسياسىن اياقتادى.
