قاراعاندىدا اشىق اسپان استىندا ۇلتتىق دومبىرا كۇنى اتاپ ءوتىلدى
قاراعاندى وبلىسىنىڭ اكىمدىگىنەن ءمالىم ەتكەندەي، مۋزىكانتتار قازاق كومپوزيتورلارىنىڭ تۋىندىلارىن ورىندادى.
اشىق اسپان استىندا تاتتىمبەت اتىنداعى اكادەميالىق حالىق اسپاپتارى وركەسترى، «ارقا سازى» فولكلورلىق ءانسامبلى جانە جاس دومبىراشىلار ونەر كورسەتتى.
كونسەرت تاتتىمبەتتىڭ «سارىجايلاۋ» كۇيىنەن باستالىپ، نۇرعيسا تىلەنديەۆتىڭ «اتا تولعاۋى»، قۇرمانعازىنىڭ «اداي» جانە «سارىارقا» تۋىندىلارىنا ۇلاستى.
«ءبىز كونسەرتكە ەش دايىندىقسىز شىقتىق، ءتىپتى الدىن الا جاتتىققان دا جوقپىز. جازعى دەمالىسقا قاراماستان بالالار دا قۋانا قاتىستى. ەلباسى تاعايىنداعان ۇلتتىق دومبىرا كۇنى ۇلكەن وقيعا. بۇل مەرەكە تەك مۋزىكا مەن ونەر سۇيەر قاۋىمدى عانا ەمەس، سونداي-اق كەڭ بايتاق ەلىمىزدىڭ بارلىق تۇرعىندارىنىڭ باسىن قوسادى. دومبىرا - ءبىزدىڭ حالقىمىزدىڭ نىشانى، اجىراماس دوسى. ول ءومىر بويى قازاقتىڭ جانىنان تابىلىپ، قيىندىقتا دا، قۋانىشتا دا بىرگە بولعان. ەندى بۇل اسپاپ ءار ۇيدە بولادى دەپ ويلايمىن، دومبىرا جاڭا لەپكە يە بولادى»، - دەيدى تاتتىمبەت اتىنداعى وركەستردىڭ ديريجەرى، ق ر ەڭبەك سىڭىرگەن قايراتكەرى، پروفەسسور دۇيسەن ۇكىباي.
