الماتى وبلىسىندا قىتايلارعا جەر بەرىلدى دەگەن اقپارات شىندىققا جاناسپايدى - اكىمدىك

تالدىقورعان. قازاقپارات - الماتى وبلىسى اكىمدىگىنىڭ باسپا ءسوز حاتشىسى عالىمۇرات جۇكەل الەۋمەتتىك جەلىلەردە تاراعان اقپاراتقا بايلانىستى تۇسىنىك بەردى، دەپ حابارلايدى قازاقپارات ءتىلشىسى.

«الەۋمەتتىك جەلىلەردە سارى وزەكتەن جاركەنتكە دەيىن جەر قىتاي كومپانياسىنا بەرىلدى جانە ول كومپانيادا 700 قىتاي ازاماتى جۇمىس ىستەيدى دەگەن قاۋەسەت تارادى. وسى جايتقا بايلانىستى تۇسىنىكتەمە جۇمىستارىن جۇرگىزدىك. اۋىلدىڭ اقساقالدارىن الىپ، سول زاۋىتتىڭ جۇمىسىن كورسەتتىك. ول جەردە الماتى وبلىسىنىڭ ءارتۇرلى ايماقتارىنان كەلگەن 100 گە جۋىق قۇرىلىسشىمەن قاتار 125 قىتايلىق ازامات جۇمىس ىستەيدى. ويتكەنى، زاۋىتتاعى قۇرىلعىلاردىڭ ءبارى قىتايدا شىعارىلعان. قىتايلىق ينجەنەرلەر جەرگىلىكتى جۇمىسشىلارعا زاۋىت تەحنولوگياسىن كورسەتىپ، ۇيرەتكەننەن كەيىن ءوز ەلىندەرىنە قايتارىلادى»، - دەدى عالىمۇرات جۇكەل.

باسپا ءسوز حاتشىسىنىڭ ايتۋىنشا، الماتى وبلىسىنىڭ كەربۇلاق اۋدانىنداعى «سارى وزەك- كوكتال» تاس جولىنىڭ بويىندا قازاقستان مەن سينگاپۋر كاسىپكەرلەرى بىرىگىپ، سەمەنت شىعاراتىن زاۋىت سالىپ جاتىر. بىرلەسكەن سەرىكتەستىكتىڭ 60 پايىزى قازاقستاندىق كاسىپكەرگە تيەسىلى بولسا، قالعان 40 پروتسەنتى سينگاپۋرلىق ينۆەستورلاردىڭ ەنشىسىندە. قۇرىلىسى ءجۇرىپ جاتقان كاسىپورىن 2019-جىلى ىسكە قوسىلادى دەپ جوسپارلانۋدا. جىلىنا 1,2 ميلليون توننا سەمەنت شىعاراتىن زاۋىتقا 50 ميلليارد تەڭگەنىڭ ينۆەستيتسياسى تارتىلۋدا.

«قازىرگى تاڭدا الماتى وبلىسى رەسپۋبليكا بويىنشا تسەمەنت وندىرۋدەن سوڭعى ورىنداردىڭ ءبىرىن الىپ تۇر. بۇل جوبانىڭ جاقىن ارادا جۇزەگە اسىرىلۋى وبلىستىڭ سەمەنت تۇتىنۋ بويىنشا ءبىرىنشى ورىندا تۇرعانىن ەسكەرە وتىرىپ، الماتى وبلىسىنىڭ وسى سالادا جەتەكشى ورىندارعا شىعۋىنا مۇمكىندىك بەرەدى دەپ ۇمىتتەنەمىز. سونىمەن قاتار، قۇرىلىس اياقتالعاننان كەيىن، ءبىزدىڭ كاسىپورىن سەمەنت شىعارىپ، وندا 387 جاڭا جۇمىس ورنى پايدا بولادى. زاۋىتقا جۇمىسشىلاردى كەربۇلاق، كوكسۋ اۋداندارى مەن قاپشاعاي قالاسىنان الىنسا دەپ جوسپارلانۋدا. جىلىنا 2 ميلليارد تەڭگەگە جۋىق سالىق تولەنەدى دەپ كۇتىلۋدە»، - دەيدى «Alacem» سەمەنت ءوندىرۋ زاۋىتىنىڭ باس ديرەكتورىنىڭ ورىنباسارى ستانيسلاۆ شەرباكوۆ.