مۇزبالاق مۋلتفيلمىنىڭ ساۋندترەگىنە كليپ ءتۇسىرىلدى

استانا. قازاقپارات - ش. ايمانوۆ اتىنداعى «قازاق فيلم» كينوستۋدياسىنىڭ وندىرىسىندەگى «مۇزبالاق» تولىقمەترلى كوركەم انيماتسيالىق فيلمىنىڭ ساۋندترەگىنە ارنالعان كليپ جاريالاندى، دەپ حابارلايدى قازاقپارات كينوستۋديانىڭ فەيسبۋكتەگى پاراقشاسىنا سىلتەمە جاساپ.

مۋزىكالىق كليپتەگى ءاندى ورىنداۋشى ءارى اۆتورى ۇشقىن جامالبەك.

ايتا كەتەرلىگى، 65 مينۋتتىق كوركەم انيماتسيالىق فيلمگە ازىرلىكتى انيماتور-رەجيسسەرلەر تىلەك تىلەۋعازى مەن تۇردىبەك مايدان 2015-جىلدىڭ قىركۇيەگىندە قولعا العان.

ال، «مۇزبالاقتىڭ» ترەيلەرى جىلدىڭ باسىندا جاريالاندى.

فيلم بويىنشا 40 قا جۋىق وتاندىق انيماتور جۇمىس ىستەدى. مۋلتفيلم 2D جانە 3D فورماتىندا تۇسىرىلگەن جانە ءار سەكۋندىندا 24-25 كادر سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى، جانات تىنىبايەۆ، سامات قورداباي، ەرعالي تولەبايەۆ، الما ءادىل قىزى ەسىمدى تەاتر جانە كينو اكتەرلەرى قاتىسقان.

بۇركىت پەن ادامنىڭ دوستىعى تۋرالى باياندايتىن بۇل مۋلتفيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن.

ەستەرىڭىزگە سالا كەتەيىك، كينوستۋديا بىلتىر تولىقمەتراجدى ەكى انيماتسيالىق فيلم شىعاردى. سونىڭ ءبىرى «مۇزبالاق» بولسا، ەكىنشىسى رەجيسسەر اداي ءابىلدانىڭ تاريحي تۇلعا، قولباسشى كۇلتەگىن تۋرالى كارتيناسى. اتالعان فيلمدەر تولىققاندى اياقتالعان جانە پروكاتى مەن تۇساۋكەسەرى ۇستىمىزدەگى جىلعا جوسپارلانعان.