استانادا «بۇگىننىڭ بالاسى - بولاشاقتىڭ داناسى» فەستيۆالى باستالدى

استانا. قازاقپارات - قازاقستاندىق بالالار ۇيلەرى دارىندى تاربيەلەنۋشىلەرىنىڭ استانا قالاسىنا كەلۋى ۇلكەن مەيرامعا اينالدى، دەپ حابارلايدى قازاقپارات ءتىلشىسى.

كۇنى كەشە استانادا ەلىمىزدىڭ تۇكپىر-تۇكپىرىنەن جينالعان ونەرلى بالالار باس قوستى. بالالاردى استانا قالاسىندا ەڭ ءبىرىنشى بولىپ انيماتورلار قارسى الىپ، اۋە شارلارىنا تولى مەيرام باستالىپ كەتتى.

بۇگىن، ياعني 28 -ماۋسىم كۇنى «قازمەديا ورتالىعىندا» 315-كە جۋىق بولاشاق جۇلدىزدار ءبىر ساحنا تورىندە ونەرلەرىن پاش ەتۋدە.

«بۇگىن بالالار ءۇشىن ۇلكەن قۋانىش، ەلىمىزدىڭ ءار وڭىرىنەن كەلگەن جاس بۇلدىرشىندەر ونەرلەرىن ورتاعا سالىپ جاتىر. وسىنداي كەڭ كولەمدى شارانىڭ ۇيىمداستىرىلىپ جاتقانىنا قۋانىشتىمىن، سەبەبى بالالار بۇل جەردە جارىسقا ءتۇسىپ قانا قويماي، ءبىر- بىرىمەن تانىسىپ، دوستاسادى. ءبىزدىڭ بالالار ۇيىنەن 38 جەتكىنشەك كەلدى، فەستيۆالدىڭ بارلىق نوميتساياسى بويىنشا قاتىسامىز. دايىندىعىمىز جوعارى دەڭگەيدە، سوندىقتان جۇلدەلى ورىنداردان ءۇمىتىمىز زور»، - دەدى №1 -الماتى وبلىستىق بالالار ءۇيىنىڭ تاربيەشىسى ءجاميلا مىرزاحمەتوۆا.

سونداي-اق فەستيۆال ۇيىمداستىرۋشىلارى ارمان قۋىپ، استانا قالاسىنا كەلە جاتقان جەتكىنشەكتەرگە اق تىلەگىن ءبىلدىرىپ، فەستيۆال ماڭىزى جايىندا وي قوزعادى.

«مەن فەستيۆالعا ءبي جانە ءسان ونەرى نوميناتسيالارى بويىنشا قاتىسىپ جاتىرمىن. فەستيۆال ەندى باستالسا دا، باسقا قالالاردان كەلگەن بالالارمەن تانىسىپ، ارالاسىپ كەتتىم. قارسىلاستارىما ساتتىلىك، وزىمە جەڭىس تىلەيمىن»، - دەيدى فەستيۆال قاتىسۋشىسى، №1-الماتى وبلىستىق بالالار ءۇيىنىڭ تاربيەلەنۋشىسى ارايلىم تالدىبايەۆا.

فەستيۆالدىڭ ءادىلقازىلار قۇرامىندا مەرۋەرت وتەكەشوۆا، مارات وماروۆ، باۋىرجان يبراگيموۆ، جەڭىس ىسقاقوۆا، تاعى باسقا مادەنيەت جانە ونەر قايراتكەرلەرى بار.

ايتا كەتەيىك، فەستيۆالدى ۇيىمداستىرۋشىلار - قازاقستان رەسپۋبليكاسىنىڭ مادەنيەت جانە سپورت مينيسترلىگى، «اكتيۆ لايف» مۇگەدەكتەردىڭ قوعامدىق بىرلەستىگى جانە باحىتجان تاجينوۆتىڭ شىعارماشىلىق شەبەرحاناسى.