اسەت يسەكەشەۆ ساۋدانى قالاي دامىتادى؟

استانا. قازاقپارات - استانا قالاسىنىڭ اكىمى اسەت يسەكەشەۆ ساۋدانى دامىتۋ جوسپارلارى جايىندا ايتىپ بەردى، دەپ حابارلايدى قازاقپارات ءتىلشىسى.

«قالا تۇرعىندارى ءۇشىن بارلىق قىزمەتتەر قولجەتىمدى بولۋى قاجەت. سونىڭ ىشىندە ساۋدا ورىندارى دا ىڭعايلى جەردە ورنالاسۋى شارت. سول سەبەپتى ءبىز قازىرگى بازارلاردى قايتا قۇرۋ جۇمىسىن باستاپ كەتتىك. استانا بويىنشا 25 بازار بار. بيىل جەتەۋى قايتا قۇرىلادى. قالعانىن ەكى جىلدىڭ ىشىندە اياقتايمىز. بۇدان بولەك، جاڭا بازارلار مەن گيپەرماركەتتەردىڭ قۇرىلىسى باستالدى. سوسىن ءبىز «شاعىن بيزنەسكە ارنالعان مىڭ ورىن» دەگەن جوبانى قولعا الدىق. اتالعان ورىندار بارلىق جەرلەردە ورنالاسقان. وسى ۋاقىتقا دەيىن 600 دەن استام ورىندى تاراتىپ بەردىك. ەندى، اۋكسيوننىڭ كەلەسى كەزەڭىن باستايمىز. ونى بلوكچەيننىڭ نەگىزىندە وتكىزەمىز. سوندا اشىقتىق بولادى»، - دەدى ءا. يسەكەشەۆ «World of Trade 2018» حالىقارالىق كونۆەنتتىڭ اشىلۋ راسىمىندە.

اكىمنىڭ ايتۋىنشا، بۇگىندە استانا كاسىپكەرلەر قالاسىنا اينالىپ كەلەدى. ەلوردا ەكونوميكاسىنىڭ 60 پروتسەنتىن شاعىن جانە ورتا بيزنەس قۇراپ وتىر. 100 مىڭنان استام كاسىپكەر تىركەلگەن. ولاردىڭ ۇشتەن ءبىرى ساۋدامەن اينالىسادى. ەلەكتروندى ساۋدا جۇيەسى دە دامىپ كەلەدى.

«بىزدە بىرنەشە ساۋدا-لوگيستيكالىق تەرمينال سالىندى. وسى جۇمىستى جالعاستىراتىن بولامىز. نەگىزگى ماقسات - استانانى ساۋدا-ساتتىق حابىنا اينالدىرۋ. ماسەلەن، قازاقستانعا كۇن سايىن AliExpress ارقىلى 70 مىڭ سالەم- ساۋقاتتار كەلەدى. سونىڭ 20 پروتسەنتى استاناعا جەتكىزىلەدى. ءسويتىپ، وسى جاقتان باسقا ايماقتارعا تاراتىلادى. قازىر ەلەكتروندى ساۋدا سالاسىندا 54 كومپانيا تىركەلگەن. بۇل تەك باسى عانا. اتالعان سالا جىل وتكەن سايىن كەڭەيەتىن بولادى»، - دەپ اتاپ كورسەتتى ءا. يسەكەشەۆ.

ايتا كەتەيىك، بۇگىن استانادا «World of Trade 2018» حالىقارالىق كونۆەنت باستالدى. جيىنعا ساۋداگەرلەر، تاۋار وندىرۋشىلەر مەن ريتەيلەرلەر كەلدى. نەگىزگى ماقسات - ساۋدا-ساتتىقتىڭ تىڭ جولدارىن انىقتاۋ.