12:52, 28 - ماۋسىم 2018 | GMT +5
اقمولا وبلىسىندا «دومبىرا» ەسكەرتكىش كومپوزيتسياسى ورناتىلدى
كوكشەتاۋ. قازاقپارات - اقمولا وبلىسىنىڭ ءبىرجان سال اۋدانىندا «دومبىرا» كىشى كومپوزيتسياسى ورناتىلدى، دەپ حابارلايدى قازاقپارات ءتىلشىسى.
ۇلتتىق دومبىرا كۇنى قارساڭىندا ستەپنياك قالاسىنىڭ ورتالىق الاڭىندا ورناتىلعان ەسكەرتكىش مەتالدان جاسالعان، بيىكتىگى 3,5 مەتردى قۇرايدى.
كومپوزيتسيانىڭ اشىلۋى سالتاناتىنا «نۇر وتان» پارتياسىنىڭ جەرگىلىكتى فيليالدارىنىڭ مۇشەلەرى، «اقجاۋلىق» كلۋبىنىڭ اجەلەرى، ب ا ق وكىلدەرى مەن قالا تۇرعىندارى قاتىستى.
كوكشەتاۋ قالاسىنىڭ تانىمال اقىنى، ءانشى جانە كومپوزيتور يران سال تاسقارا ءوزىنىڭ قۇتتىقتاۋ سوزىنەن كەيىن ءبىرجان سال بابامىزدىڭ اندەرىن قازاق، ورىس جانە ۋكراين تىلدەرىندە ورىندادى.
«وسكەلەن ۇرپاقتى ۇلتجاندىلىققا، رۋحاني تەرەڭدىككە تاربيەلەيمىز دەسەك، بۇل شارانىڭ ءمانى وراسان»، - دەدى قۇتتىقتاۋ سوزىندە ءبىرجان سال اۋدانى اكىمىنىڭ مىندەتىن اتقارۋشى ەرسايىن سابىروۆ.
سالتاناتتى شارا ءبىرجان سال اتىنداعى بالالار مۋزىكالىق مەكتەبىندە ءوز جالعاسىن تاپتى.
