تۇركىستاندا «ۇلتتىق دومبىرا» كۇنى اتالىپ ءوتتى
مادەني شاراعا ەلىمىزگە بەلگىلى ايتىسكەر اقىندار مەن دومبىراشى ونەرپازدار، ۇلتتىق-مادەني ورتالىق جەتەكشىلەرى مەن زيالى قاۋىم جانە جەرگىلىكتى ب ا ق وكىلدەرى قاتىستى.
ايتا كەتەيىك، ەلباسى نۇرسۇلتان نازاربايەۆ بيىلدان باستاپ ءار شىلدەنىڭ العاشقى جەكسەنبىسىن «ۇلتتىق دومبىرا» كۇنى دەپ جاريالاعان بولاتىن. ەلباسى جارلىعىندا ايتىلعان ماسەلە - ۇلتتىق ءداستۇر مەن ونەردى جاڭعىرتىپ، دارىپتەۋگە جول سالادى. جيىن بارىسىندا «ازىرەت سۇلتان» مەملەكەتتىك تاريحي- مادەني قورىق- مۋزەيىنىڭ ديرەكتورى نۇربولات احمەتجانوۆ شاراعا كەلگەن بارشا قوناقتاردى «ۇلتتىق دومبىرا» كۇنىمەن قۇتتىقتاپ، ۇلتتىق ونەردى جالعاستىرۋ مەن قاسيەتتى دومبىرانى سەرىك ەتكەن ونەرپازدارعا تىلەگىن ءبىلدىردى. ال، مۋزەيدىڭ باس رەداكتورى دومبىرا تۋرالى بايانداما وقىپ، ۇلتتىق اسپاپتىڭ ەرەكشەلىكتەرى مەن شىعۋ تاريحىنا توقتالدى.
دومبىراشىلار باس قوسۋىندا تۇركىستان قالالىق «ونەر» مەكتەبىنىڭ جاس ونەرپازدارى «دومبىرانىڭ شاتتىق ءۇنى» جانە «ەركە سىلقىم» كۇيلەرىن ورىندادى. سونداي-اق «الىستان قىزىل كورىنسە»، «ولشەۋلى ءومىر»، «جاقسى مەن جامان» تەرمەلەرىن جانە «ءوزىم تۋرالى» اتتى تولعاۋلارىن شىرقاپ، كوپشىلىكتىڭ قوشەمەتىنە بولەندى.
بۇدان بولەك، كەنتاۋ قالاسىنىڭ قۇرمەتتى ازاماتى، كومپوزيتورلار وداعىنىڭ مۇشەسى الىمبەك قونىسبەكوۆ «قاراتاۋ شەرتپەسى»، «سالتانات» جانە «ءوتتىڭ داۋرەن» كۇيلەرىن شەرتتى.
تۇركىستان قالالىق «ياسسى» حالىقتىق- فولكلورلىق ءانسامبلى «بوزىنگەن»، «اتا تولعاۋى»، «اداي»، «باقتىبايدىڭ اۋەنى» سياقتى كۇيلەرىمەن كوپشىلىككە ەرەكشە اسەر قالدىردى.
حالىقتىڭ سۇراۋى بويىنشا «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ باسشىسى دا قۇرمانعازىنىڭ «بالبىراۋىن» كۇيىن ورىنداپ، قوناقتاردىڭ ايرىقشا ىقىلاسىنا بولەندى.
شارا سوڭىندا بارشا ونەرپازدارعا مۋزەيدىڭ باسپا ونىمدەرى سىيعا تارتىلدى.
