جاپون حانشايىمى قاراپايىم جىگىتكە تۇرمىسقا شىعۋ ءۇشىن تاق مۇراگەرلىگىنەن باس تارتتى

استانا. قازاقپارات - جاپون حانشايىمى اياكو تاكامادو قاراپايىم جىگىتكە تۇرمىسقا شىعاتىنىن حابارلاپ، تاق مۇراگەرلىگىنەن باس تارتتى.

بۇل تۋرالى CNN حابارلادى.

جاپونيانىڭ يمپەراتورلىق سارايىنىڭ باسقارماسى نوريحيتو تاكامادونىڭ ءۇشىنشى جانە ەڭ كىشى قىزى كەمەدە جۇمىس ىستەيتىن 32 جاستاعى كەەم مورياعا تۇرمىسقا شىعاتىنىن رەسمي تۇردە حابارلادى.

عاشىقتاردىڭ تانىسقانىنا ءبىر جىل دا بولماعان. ولاردىڭ نەكەلەسۋ ءراسىمى 12- تامىزعا، ال ۇيلەنۋ تويى - 29 قازانعا جوسپارلانعان. ال، سوڭعى سالتاناتتى ءىس-شارا مەيدزي عيباداتحاناسىندا وتەدى. اياكو جانە كەەم جاھاندىق وركەندەۋگە ۇلەس قوسۋعا دەگەن نيەتتەن تەز ءتىل تابىسىپ، جاقىنداسىپ كەتكەندەرىن مويىندادى. سونىمەن قاتار، ەكەۋى دە كىتاپ وقىپ، شاڭعى تەۋىپ، ساياحاتتاعاندى ۇناتادى ەكەن.

يمپەراتورلىق ادەت-عۇرىپقا ساي، جاپون حانشايىمى ۇيلەنۋ ءراسىمى وتكەننەن كەيىن تاق مۇراگەرى اتاعىنان ايىرىلادى. دەگەنمەن، وعان شامامەن ميلليون دوللار بەرىلەدى.

ايتا كەتەيىك، اياكو - ماحاببات ءۇشىن تاق مۇراگەرلىگىنەن باس تارتقان العاشقى حانشايىم ەمەس. جاپون پاتشاسى اكيحيتو مەن ميتيكو پاتشايىمنىڭ نەمەرەسى ماكو اسيكينو قاراپايىم جىگىتپەن نەكەلەستى. ولاردىڭ نەكەلەسۋ ءراسىمى 2017-جىلدىڭ قىركۇيەك ايىندا ءوتتى. الايدا، بيىلعى جىلدىڭ اقپانىندا ەرلى-زايىپتىلار نەكە قۇرۋعا ءالى دايىن ەمەس ەكەندىكتەرىن حابارلادى.