تۇركىستان قالاسىنىڭ باس جوسپار ەكى كەزەڭگە بولىنەدى
بۇل تۋرالى ق ر پرەمەر-ءمينيسترىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
ۇكىمەتتىك كوميسسيا ءتوراعاسى 2018-جىلعى 19- ماۋسىمدا مەملەكەت باسشىسىنىڭ تۇركىستان وبلىسىن قۇرۋ تۋرالى جارلىعى - تاريحي ماڭىزدى قۇجاتى جارىق كورگەندىگىن اتاپ ءوتتى.
«قاسيەتتى تۇركىستان قالاسى بۇكىل تۇرىك الەمىنىڭ مادەني-رۋحاني استاناسى، قۇتتى مەكەنى. مەملەكەت باسشىسىنىڭ ستراتەگيالىق شەشىمىنىڭ ارقاسىندا بۇل ايماقتىڭ وركەندەۋىنە قارقىندى سەرپىن بەرىلەدى. تۇركىستان قالاسىنىڭ وبلىس ورتالىعى رەتىندە وركەندەپ دامۋى ءۇشىن بارلىق الەۋەتى بار. الدىمەن قالانىڭ باس جوسپارىن دايىنداۋىمىز قاجەت. تۇركىستان قالاسىنىڭ قارقىندى ينفراقۇرىلىمدىق دامۋىن قامتاماسىز ەتۋ كەرەك»، - دەپ اتاپ ءوتتى ا. مامين.
كوميسسيانىڭ العاشقى وتىرىسىندا وبلىستىق مەملەكەتتىك ورگانداردى شىمكەنت قالاسىنان تۇركىستان قالاسىنا كوشىرۋ ماسەلەسى، قالانىڭ ينجەنەرلىك-كوممۋنيكاتسيالىق ينفراقۇرىلىمىنىڭ قازىرگى جاعدايى، تۇركىستان قالاسى باس جوسپارىنىڭ تۇجىرىمداماسىن ازىرلەۋ جانە وتكىزۋ، وبلىس ەكونوميكاسىنىڭ ودان ءارى دامۋ ماسەلەسى قارالدى.
وبلىس اكىمى ج. تۇيمەبايەۆتىڭ حابارلاۋىنشا، مەملەكەت باسشىسىنىڭ وبلىس ورتالىعىن تۇركىستان قالاسىنا كوشىرۋ جونىندەگى جارلىعىن ورىنداۋ ماقساتىندا ارنايى شتاب قۇرىلدى. اكىمشىلىك باسقارۋ ورىندارىنىڭ كوشىپ ورنالاسۋ جوسپارى جاسالدى. ءوڭىردى الەۋمەتتىك- ەكونوميكالىق دامىتۋدىڭ نەگىزگى باعىتتارى بەلگىلەندى. نەگىزگى ەنەرگەتيكالىق ينفراقۇرىلىمدىق نىساندار، سۋمەن قامتۋ جۇيەلەرى، كولىك - لوگيستيكالىق جەلىسى، قىزمەت كورسەتۋ مەن تۋريستىك ورتالىقتاردى ودان ءارى دامىتۋ جايى قارالدى.
تۇركىستان قالاسىنىڭ دامۋى جونىندە قالا اكىمى ءا. وسەربايەۆ باياندادى. قالانىڭ باس جوسپارى مەن ءوڭىردىڭ ەكونوميكاسىن دامىتۋ تۋرالى ينۆەستيتسيا جانە دامۋ ۆيتسە- ءمينيسترى ق. وسكەنبايەۆ، ۇلتتىق ەكونوميكا ۆيتسە-ءمينيسترى ا. جۇماعۇلوۆ باياندادى.
ق ر پرەمەر-ءمينيسترىنىڭ ءبىرىنشى ورىنباسارى وتىرىس قورىتىندىسى بويىنشا مەملەكەتتىك ورگاندار مەن وبلىس اكىمشىلىگىنە شىمكەنتتەن تۇركىستانعا كوشۋ ماسەلەسىنە قاتىستى ءبىرقاتار ناقتى تاپسىرمالار بەردى.
ءتيىستى مينيسترلىكتەر مەن مەكەمەلەرگە تۇركىستان قالاسىنىڭ ينجەنەرلىك جانە الەۋمەتتىك ينفراقۇرىلىمىن دامىتۋ ماقساتىنداعى سالالىق باس نوبايىن جاساۋدى باستاۋ تۋرالى تاپسىرما بەرىلدى.
2018-جىلعى 12- شىلدەدە باس جوسپاردىڭ تۇجىرىمداماسىن دايىنداۋعا كونكۋرس جاريالانادى. كونكۋرس ەكى ايدىڭ ىشىندە وتەتىن بولادى. حالىقارالىق ساراپشىلار توبى قۇرىلادى. كونكۋرسقا قاتىسۋعا وتاندىق جانە حالىقارالىق ساۋلەتشىلەر شاقىرىلادى.
باس جوسپار ەكى كەزەڭگە بولىنەدى. ءبىرىنشى كەزەڭ - 2035- جىلعا دەيىن، ەكىنشى كەزەڭ- 2050- جىلعا دەيىن. بيىلعى قىركۇيەككە دەيىن باس جوسپاردىڭ تۇجىرىمداماسى ازىرلەنەدى. ۇزدىك تۇجىرىمداما انىقتالعان سوڭ، ونى جۇزەگە اسىرۋعا بايقاۋ جاريالانادى.
ا. مامين تۇركىستان وبلىسىنا ساپارى بارىسىندا تۇركىستاننىڭ ءبىرقاتار ينفراقۇرىلىمدىق نىساندارىن ارالادى.
اتاپ وتەرلىگى، مەملەكەت باسشىسىنىڭ تۇركىستان وبلىسىن قۇرۋ جونىندەگى تاپسىرماسىنا بايلانىستى باس جوسپاردى جاساۋ جونىندەگى ۇكىمەتتىك كوميسسيا قۇرىلدى. ق ر پرەمەر-ءمينيسترىنىڭ ءبىرىنشى ورىنباسارى ا. ءماميننىڭ باسقارۋىمەن تۇركىستان قالاسىن تۇركى دۇنيەسىنىڭ مادەني جانە رۋحاني ورتالىعى رەتىندە دامىتۋدىڭ ۇكىمەتتىك كوميسسياسى قۇرىلعان بولاتىن.
