استانا اۆتوبۋستارىندا كوندۋكتور بولمايدى

استانا. قازاقپارات - شىلدە ايىنىڭ سوڭىنا دەيىن ەلوردانىڭ قوعامدىق كولىكتەرىندە سارالانعان تاريف ەنگىزىلەتىن بولادى.

بۇل تۋرالى بۇگىن استانانىڭ قوعامدىق كەڭەسىنەن كەيىن «استانا LRT»  ج ش س-نىڭ باسقارما ءتوراعاسى بەكمىرزا يگەنبەردينوۆ ايتتى، دەپ حابارلايدى قازاقپارات ءتىلشىسى.

«جاڭا جۇيە ەنگىزىلگەننەن كەيىن كوندۋكتورلاردى اۆتوماتتى تۇردە الىپ تاستاۋ جوسپارلانعان. دەگەنمەن، بۇعان دەيىن كوندۋكتورلاردى ودان ارى جۇمىسقا ورنالاستىرۋ ماسەلەسى ايتىلعان بولاتىن. جەلىدە ءبىرىنشى جىل جۇمىس ىستەپ جۇرمەگەن كاسىبي ماماندار اۆتوبۋس پاركىنىڭ باقىلاۋ جەلىسىنە نەمەسە كولىكتىك باقىلاۋ قىزمەتىنە جۇمىسقا ورنالاستىرىلادى»، - دەدى ول ب ا ق وكىلدەرىنە بەرگەن سۇحباتىندا.

ونىڭ ايتۋىنشا، ەلوردانىڭ اۆتوبۋس پاركتەرىندە مىڭنان استام كوندۋكتور جۇمىس ىستەيدى.

«ال سارالانعان ءتاريفتى شىلدە ايىنىڭ سوڭىنا دەيىن مىندەتتى تۇردە ەنگىزەمىز دە جىلدىڭ سوڭىنا دەيىن سارالانعان تاريفكە ساراپتاما جۇرگىزەمىز. ياعني، سارالانعان تاريف بىزگە جولاۋشىلار اعىنىنا تولىق ءارى تۇسىنىكتى ساراپتاما جۇرگىزۋگە مۇمكىندىك بەرەدى»، - دەدى ول.

ايتا كەتەيىك، سارالانعان تاريف ەنگىزىلگەن كەزدە قوعامدىق كولىكتە جول ءجۇرۋ قۇنى كولىك كارتاسىمەن تولەۋ كەزىندە 90 تەڭگەنى قۇرايدى. ال قوعامدىق كولىكتى ءجيى پايدالانبايتىن نەمەسە كارتا الۋدى قاجەت دەپ ەسەپتەمەيتىندەر ءۇشىن جول ءجۇرۋ قۇنى 180 تەڭگە بولادى.