قىدىرالى بولمانوۆ استاناداعى داۋلى عيماراتقا قاتىستى مالىمدەمە جاسادى
2018 -جىلعى 22 -ماۋسىمىندا ىرزا تۇرسىنزادا قىدىرالى بولمانوۆ پەن قاراقات ءابىلدينانى استاناداعى مايلين كوشەسىندە ورنالاسقان عيماراتتى زاڭسىز يەمدەندى دەپ ايىپتاعان بولاتىن.
بولمانوۆتىڭ ايتۋىنشا، داۋلى عيمارات كوممۋنالدىق نىسان بولىپ تابىلادى جانە ونى بالالار مەكتەبىنە ىڭعايلى ورىن رەتىندە قۇزىرەتتى ورگاندار تاعايىنداعان.
«ءبىر جارىم جىل بۇرىن مەملەكەتتىك-جەكەشەلىك ارىپتەستىك اياسىندا مەكتەپ اشۋ تۋرالى اكىمدىككە حات جازىلعان بولاتىن. بۇل مەكتەپتە وقۋ اقىسىن تولەۋ مۇمكىندىگى جوق بالالار وقيدى. ولاردىڭ كەيبىرى ناۋقاس، ءبىراق تالانتتى، ەڭ باستىسى ونەر ۇيرەنۋگە ىنتالى بالالار. وسىلايشا، ەلۋدەن استام بالا وقۋعا جازىلدى. ءبىراق، مەكتەپتىڭ ءوزى جالعا الىنعان، ونداعى 25 مۇعالىمگە جالاقى تولەۋ كەرەك. بالالاردىڭ تەڭ جارتىسىن تەگىن وقىتا الماعاندىقتان، مەملەكەتتىك-جەكەشەلىك ارىپتەستىك اياسىندا اكىمدىكتەن تومەن باعادا عيماراتتى جالعا الۋعا ءوتىنىم بىلدىردىك. قازىردىڭ وزىندە 30 بالانى تەگىن وقۋعا قابىلداپ قويدىق، ولاردىڭ اراسىندا ناۋقاس، اتا-اناسىز قالعان نەمەسە الەۋمەتتىك جاعدايى تومەن بالالار بار»، - دەدى قىدىرالى بولمانوۆ استانادا وتكەن باسپا ءسوز ءماسليحاتىندا.
قىدىرالى بولمانوۆتىڭ قورعاۋشىسى امانبول ابەۋوۆ بارلىق زاڭدى قۇجاتتاردى كورسەتىپ، زاڭسىز تۇرعىنداردىڭ ۇزاق ۋاقىت بويى بايلانىسقا شىقپاعانىن جەتكىزدى.
نىساندى جالعا بەرگەن «استانا» الەۋمەتتىك- كاسىپكەرلىك كورپوراتيۆى 2017 -جىلدىڭ جەلتوقسان ايىندا عيماراتتا تۇرىپ جاتقان زاڭسىز تۇرعىنداردى انىقتاۋ تۋرالى ىشكى ىستەر ورگاندارىنا ءوتىنىش جازعان. كەيىنىرەك، 2018 -جىلدىڭ قاڭتار ايىندا استانا قالاسىنىڭ الماتى اۋدانى اكىمدىگى دە پوليتسياعا جۇگىنگەن. ءبىراق، عيماراتتاعى زاڭسىز تۇرعىندار انىقتالماعان جانە كەرى بايلانىسقا شىقپاعان.
«استانا» ا ك ك مەن «قاراقات» مەكتەپ- ستۋدياسىن» باسقاراتىن «ايسۇلتان ارت» كومپانياسى اراسىندا كەلىسىمشارت ورناعان سوڭ، كومپانيا ادۆوكاتتىق كەڭسە جالداعان. ادۆوكاتتىق كەڭسە جيناعان دەرەكتەرگە سايكەس، سوت عيماراتتا زاڭسىز تۇرىپ جاتقان تۇلعالاردى ماجبۇرلەپ كوشىرۋ تۋرالى شەشىم قابىلداعان. قۇزىرلى ورگاندار دا، قىدىرالى بولمانوۆ پەن قاراقات ءابىلدينا دا عيماراتتا كىمنىڭ تۇرىپ جاتقانىن انىقتاي الماعان»، - دەپ ءتۇسىندىردى زاڭگەر.
ءوز كەزەگىندە بولمانوۆ قۇقىقتىق جۇمىستارمەن مەكتەپ ديرەكتورى اينالىسقانىن، عيماراتتا قولونەرشى ىرزا تۇرسىنزادانىڭ تۇرىپ جاتقانىن بىلمەگەنىن ايتتى.
«ىرزا اپايمەن ەتەنە ارالاسقان ەمەسپىز، ءبىراق سالەمىمىز ءتۇزۋ. جارنامالىق قولداۋ سۇراعاندا دا، بارىنشا كومەكتەستىك. ەكسپو-دا ۇلكەن كيىز ءۇي تىكتى، وعان قاراقاتتى كىشكەنتاي سابيىمەن فوتو ءتۇسىرىلىم جاساۋعا شاقىردى. سوندا قاراقات ۇلكەن كىسىنىڭ ءوتىنىشىن جەرگە تاستاماي، قىرقىنان شىقپاعان سابيىمەن باردى. ىرزا اپايدىڭ «ۇيىمە تالاي كەلدى، كيىز ۇيىمدە فوتوعا ءتۇستى» دەۋى جالعان. بۇل عيماراتقا كەلىپ كورمەگەنبىز جانە ىرزا تۇرسىنزادانىڭ قايدا تۇراتىنىن دا بىلمەگەنبىز. قاراقاتتىڭ بەس بالاسى بار، ەفيرلىك ۋاقىتى بار، كوپتەگەن قوعامدىق جۇمىستارىمەن اينالىسادى. مەكتەپتىڭ ءىس-قاعازدارىنا مۇلدەم ارالاسپاعان. مەن دە كونسەرتتىڭ شارۋالارىنا كوڭىل ءبولىپ، قۇقىقتىق جۇمىستاردى ادۆوكاتتىق كەڭسەگە تاپسىرعانمىن. عيماراتتا ەتنوونەردى ناسيحاتتاپ جۇرگەن ىرزا تۇرسىنزادانىڭ تۇرىپ جاتقانىن الۋمەتتىك كورپوراتيۆ، ىشكى ىستەر باسقارماسى، اكىمدىك انىقتاي الماعاندا، ءبىز قايدان بىلەمىز؟ ادۆوكاتتار مەن سوت ورىنداۋشىلار ىرزا تۇرسىنزادانىڭ كىم ەكەنىن تانىمايدى، ولار زاڭعا سايكەس ءوز مىندەتتەرىن اتقارعان»، - دەپ ءوز ءسوزىن تولىقتىردى بولمانوۆ.
پروديۋسەردىڭ ايتۋىنشا، عيماراتتىڭ الداعى تاعدىرى ءالى دە بەلگىسىز.
«بۇل نىسان ەشكىمنىڭ مەنشىگىندەگى دۇنيە ەمەس. مەملەكەت تاراپىنان جالعا بەرىلەتىن عيمارات. سوندىقتان، ىرزا اپايدىڭ جاسىن سىيلاپ، باس تارتايىق، بەرە سالايىق دەگەن اڭگىمە جۇرمەيدى. ول كىسى دە بىزگە ءبىر اۋىز حابارلاسپاستان، جۋرناليستەردى جيناپ الىپ، ءبىزدىڭ تاراپقا ايىپتاۋلاردى بوراتتى. ايەل اداممەن تارتىسپايىن، ۇندەمەي قويا سالايىن دەدىم. ءبىراق، ەسەيىپ قالعان ۇلىم الەۋمەتتىك جەلىدەن كورىپ، «اكە، بۇل راس پا؟» دەپ سۇراق قويدى. ءبىزدىڭ ارىمىز تازا، ءبىز ەشكىمنىڭ مۇلكىن تارتىپ العان جوقپىز. ەرتەرەك بىلگەندە بالكىم ءىس وڭاي شەشىلەر مە ەدى؟ وتباسىمدى قورعاۋ ءۇشىن، بىزگە قارسى ايتىلىپ جاتقان سوزدەرگە توقتاۋ سالۋ ءۇشىن سىزدەردى جيناپ وتىرمىن»، - دەدى قىدىرالى بولمانوۆ.
