مەملەكەتتىك قىزمەت ىستەرى اگەنتتىگىنىڭ ءتوراعاسىنا كەز كەلگەن ازامات تىكەلەي شىعا الادى
بۇل تۋرالى و ك ق-دا وتكەن باسپا ءسوز ءماسليحاتىندا اگەنتتىكتىڭ قوعاممەن بايلانىس جونىندەگى دەپارتامەنتىنىڭ ديرەكتورى ارمان بەردالين ءمالىم ەتتى، دەپ حابارلايدى قازاقپارات ءتىلشىسى.
«اگەنتتىكتىڭ جانىنان ارنايى مونيتورينگتىك توپتىڭ قۇرىلعانداعى ماقساتى - بۇل ەڭ الدىمەن قوعامنىڭ كوزىمەن «مەملەكەتتىك قىزمەتتە قانداي كەمشىلىكتەر كەتىپ جاتىر؟ جەمقورلىقتى قايتسەك جەڭۋگە بولادى؟» دەگەن سۇراقتارعا جاۋاپ ىزدەۋ. ءبىز قازاقستاننىڭ بارلىق وڭىرلەرىن ارالاپ شىققان بولاتىنبىز. ءبىراق، بۇل جەردە ايتا كەتۋ كەرەك، تەك وبلىس ورتالىقتارىن عانا ەمەس، شالعايداعى جاتقان اۋدان-اۋىلدارعا بارىپ، شامامىز كەلگەنشە سول كەزدەگى حالىقتىڭ وي-پىكىرىن تىڭداپ، ول جەردەگى حال-احۋالدى كورىپ، ولارعا كورسەتىلىپ جاتقان مەملەكەتتىك قىزمەت دەر كەزىندە ساپالى جەتىپ جاتىر ما دەگەن سۇراققا جاۋاپ ىزدەدىك»، - دەيدى ول.
ارمان بەرداليننىڭ ايتۋىنشا، قازىرگى تاڭدا مەملەكەتتىك قىزمەتتىڭ كورسەتىلىپ جاتقان 746 ءتۇرى بار. سونىڭ 70 پايىزدان استامى ەلەكتروندى تۇردە قولجەتىمدى بولىپ وتىر.
«وسىنىڭ ساپاسى قانداي دەڭگەيدە؟ ءبىز باقىلاعانداي تالاي وڭىرلەردە ءالى كۇنگە دەيىن ينتەرنەتتىڭ جەتىسپەۋشىلىگى بارىن كورىپ كەلدىك. ال باياعىدان ءبىر قاعازدى الۋ ءۇشىن اۋدان ورتالىعى نەمەسە وبلىس ورتالىعىنا اقشاسىن شىعىنداپ، قانشا ادام كەلىپ- كەتىپ ءجۇردى. ال ءقازىر ۇيدەن شىقپاي- اق مەملەكەتتىك قىزمەتتى 10-15 مينۋتتىڭ ىشىندە الۋعا مۇمكىندىك بار. وسىنى حالىق بىلە مە، پايدالانا الىپ جاتىر ما - وسىلاردىڭ بارلىعىن باقىلاپ كەلدىك»، - دەيدى ارمان بەردالين.
دەپارتامەنت باسشىسىنىڭ ايتۋىنا قاراعاندا، ارنايى مونيتورينگتىك توپتىڭ قۇرامىندا مەملەكەتتىك قىزمەتشىلەر جوق.
«ونىڭ ىشىندە تەك قوعامدىق پىكىر قالىپتاستىراتىن، قوعامنىڭ بەلسەندىلەرى - ياعني بارماق باستى، كوز قىستى بولماس ءۇشىن، «قارعانىڭ كوزىن قارعا شۇقىمايدى» دەپ ايتقىزباس ءۇشىن ەشكىمگە تاۋەلسىز ساراپشىلاردى ءبىز اگەنتتىكتىڭ قۇرامىن تارتىپ، وڭىرلەردى ارالاپ كەلدىك. ارالاپ قانا قويماي، قازىرگى تاڭدا ءاربىر اۋداندا مونيتورينگتىك توپتار بار ەكەنىن ايتا كەتكىمىز كەلەدى. ولار ءبىز كورىپ كەتكەن كەمشىلىكتەر مەن ۇسىنىستارىمىزدىڭ بارلىعىن نازاردان شىعارماي، ءارقاشان اكىمدىكتەردىڭ نازارىنا ۇسىنىپ وتىراتىن بولادى. سوندىقتان، ەڭ الدىمەن حالىققا اشىق ەكەنىمىزدىڭ جەتكىزگىمىز كەلدى»، - دەيدى ول.
ارمان بەردالين، سونداي-اق، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆقا كەز كەلگەن قازاقستاندىق كەز كەلگەن ۋاقىتتا الەۋمەتتىك جەلى ارقىلى تىكەلەي شىعا الاتىنىن ەسكە سالدى.
«قازىر اگەنتتىكتىڭ ءتوراعاسى اليك شپەكبايەۆتىڭ فەيسبۋك جانە تەلەگرام جەلىلەرىندە ءوزىنىڭ جەكە پاراقشالارى بار. كەز كەلگەن قازاقستاندىق كەز كەلگەن ۋاقىتتا ءوزىنىڭ تىكەلەي سۇراعىن، ەشقانداي ادامسىز، بوگەتسىز سول كىسىگە سۇراق قويا الادى. ودان بولەك، قوعامدىق باقىلاۋ كارتاسى بارىن اتاپ وتكىم كەلەدى»، - دەدى ول.
