اتىراۋلىق ارحەولوگتار قاراباۋداعى قورعانداردان قۇندى جادىگەرلەر تاپتى
سونىمەن قاتار اتالمىش ايماقتان جانۋارلاردىڭ سۇيەكتەرى، اينا سىنىقتارى، مونشاق، قىش قۇمىرالار، اشەكەي بۇيىمدار تابىلدى.
ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ گۋمانيتارلىق عىلىمدار جانە ونەر فاكۋلتەتىنىڭ تاريحشى- عالىمدارى قاراباۋ وڭىرىنە ەكىنشى جىل بارۋى. بۇل ارحەولوگيالىق ەكسپەديتسيانىڭ نەگىزگى ماقساتى - ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ەلىمىزدىڭ وتكەن تاريحىن تارازىلاپ، شەجىرەسىن جيناقتاپ، كونە جادىگەرلەرىمىزدى بۇگىنگى ۇرپاققا اماناتتاۋ.
سارمات تايپالارى بۇگىنگى اتىراۋ ءوڭىرىن ب. ز. ب. VІІІ-V عاسىرلاردا مەكەندەگەنى تاريحتان بەلگىلى.
اسىرەسە، «قاراباۋ-4» وباسىنىڭ كۇنباتىس جاعىنان بيىكتىگى 4-5 مەتر، ەنى 26 مەتر بولاتىن عيباداتحانانىڭ تابىلۋى كوپ زەرتتەۋدى قاجەت ەتەدى. ال، بۇل وبانىڭ اينالاسىندا ءالى 200-دەن استام شاعىن وبالار بار.
«بۇل جەردە مەكەندەگەن سارمات تايپالارىنىڭ كۇنگە تابىنۋ ءداستۇرى بولعان. ەگەر ءدال وسى جەردى اەروعارىشتان سۋرەتكە تۇسىرەتىن بولسا، ورتاسىندا كۇن، اينالا تابىنعان ادامدار توبىنىڭ سۋرەتى ايقىن كورىنەدى»، - دەيدى تاريح عىلىمدارىنىڭ دوكتورى، پروفەسسور اققالي احمەت.
