فۋتبولدان ءا چ: پەرۋ اۆستراليانى «قۇرعاق» ەسەپپەن جەڭدى

استانا. قازاقپارات - فۋتبولدان الەم بىرىنشىلىگىنىڭ توپتىق كەزەڭىندەگى س توبىندا ءۇشىنشى تۋر ويىندارى مارەگە جەتتى.

وسى توپتاعى پەرۋ مەن اۆستراليا قۇرامالارى اراسىنداعى كەزدەسۋدە العاشقىسى 2:0 ەسەبىمەن جەڭىسكە جەتتى، دەپ حابارلايدى قازاقپارات ءتىلشىسى.

جانكۇيەر قاۋىم بۇل كەزدەسۋگە ونشا قىزىعۋشىلىق بىلدىرە قويمادى. ونىڭ سەبەبى دە جوق ەمەس. قوس قۇراما الەمدىك فۋتبولدا اسا زور باعالانا بەرمەيدى. كوپ جاعدايدا ولار توپتىق كەزەڭنەن ارىگە بارا المايدى. بيىل دا سولاي بولدى. اۆستراليا دانيامەن كەزدەسۋدە 1:1 ەسەبىمەن تەڭ ويناپ، جارىستى جالعاستىرۋ مۇمكىندىگىنەن قول ۇزە قويعان جوق. الايدا ادەمى ويىن ورنەگىمەن كوپشىلىك كوزىنە تۇسە قويماعانى بەلگىلى. پەرۋ دە سولاي بولدى.

وڭتۇستىك امەريكا قۇرلىعىنىڭ وكىلدەرى العاشقى ەكى تۋردا قارسىلاستارىنا ەسە جىبەردى. فرانسيا مەن دانياعا 0:1 ەسەبىمەن جەڭىلدى. سوندىقتان ولار ءۇشىن سوڭعى تۋر ەشقانداي ماسەلەنى شەشپەيتىن ەدى. ايتسە دە، ويىن الدىندا بەرگەن باسپا ءسوز ءماسليحاتىندا سوڭعى تۋردا جەڭىس ءۇشىن جانتالاسقا تۇسەتىنىن مالىمدەدى.

سول ءۇشىن دە ءبىرىنشى كەزەڭدە بارىن سالدى. گول 18-مينۋتتا سوعىلدى. ونى حوسە پاولو گەررەرونىڭ پاسىنان كەيىن اندرە كارريلو سالدى. بۇل اۆستراليالىق جىگىتتەردىڭ نامىسىن وياتقانداي. ولار شابۋىل شەبىنە كوڭىل ءبولدى. دەسە دە پەرۋلىك جىگىتتەر وعان لايىقتى قارسى تۇرا ءبىلدى. بۇدان كەيىن دە قوس قۇراما تاراپىنان بىرنەشە قاۋىپتى ساتتەر بولدى. سوعان قاراماستان تابلوداعى ەسەپ سول كۇيى وزگەرىسسىز تۇردى.

بۇدان بۇرىن حابارلاعانىمىزداي، اتالمىش كەزدەسۋدىڭ قوس قۇراما ءۇشىن تاريحي ماڭىزى بولدى. ەكەۋى مۇنداي دودادا بىرنەشە مارتە باق سىناعانىمەن ءبىر- بىرىمەن جولدارى تۇيىسە قويماعان ەكەن. سوندىقتان اتالمىش ويىن ولاردىڭ جاسىل الاڭ تورىندە تۇڭعىش رەت شەبەرلىك بايقاسقان كەزدەسۋى رەتىندە ساقتالىپ قالدى.

كەزدەسۋ تاعدىرى 50-مينۋتتا تولىقتاي شەشىلگەن سەكىلدى. پەرۋ ساپىنان حوسە پاولو گەررەرو مەرگەندىك تانىتىپ، ەسەپتى ۇلعايتا ءتۇستى. ەسەپ 2:0. وڭتۇستىك امەريكادان كەلگەن قۇراما وسىلايشا ەسەپتى ۇستەمەلەدى. اۆستراليا تارازى باسىن تەڭەستىرۋگە قانشا تىرىسقانىمەن، ودان ەشبىر ناتيجە بولمادى.

ايتا كەتەيىك، بۇگىن س توبىندا تاعى ءبىر كەزدەسۋ ءوتتى. فرانسيا مەن دانيا اراسىنداعى ويىندا 0:0 ەسەبى تىركەلدى. جارىستى جالعاستىرۋ مۇمكىندىگىنە فرانسيا مەن دانيا يە بولدى. ءۇشىنشى ورىن پەرۋگە بۇيىرسا، ءتورتىنشى ورىن اۆستراليانىڭ ەنشىسىنە جازىلدى.

كەشە سونداي-اق D توبىندا نيگەريا مەن ارگەنتينا («Qazaqstan» .00.00)، يسلانديا مەن حورۆاتيا («Qazsport». 00.00) قۇرامالارى كەزدەستى.

27 -ماۋسىمدا E جانە F توپتارىنداعى قۇرامالار توپتىق كەزەڭدەگى ءۇشىنشى تۋر ويىندارىن وتكىزەدى. ە توبىندا سەربيا مەن برازيليا («Qazaqstan» . 00.00)، شۆەيتساريا مەن كوستا- ريكا («Qazsport». 00.00) كەزدەسەدى. ال F توبىندا مەكسيكا مەن شۆەتسيا («Qazsport». 20.00)، وڭتۇستىك كورەيا مەن گەرمانيا («Qazaqstan». 20.00) قۇرامالارى وينايدى.