رەسەي بەنزينىن شەكتەۋ باعاعا اسەر ەتە مە - مينيستر جاۋابى

استانا. قازاقپارات - قازاقستان شەتەلدەن يمپورتتالاتىن بەنزيندى ۋاقىتشا شەكتەمەسە، وتاندىق مۇناي-وڭدەۋ زاۋىتتارىنىڭ ونىمدىلىگى تومەندەپ كەتەدى.

ۇكىمەت وتىرىسىنان كەيىن تىلشىلەردىڭ ساۋالىنا جاۋاپ بەرگەن ەنەرگەتيكا ءمينيسترى قانات بوزىمبايەۆ وسىلاي دەدى، دەپ حابارلايدى قازاقپارات ءتىلشىسى.

«بۇل - تەمىر جول كولىگى بويىنشا بىرنەشە ايلىق ۋاقىتشا شەكتەۋ. شارا نارىقتاعى جاعدايدى تۇراقتاندىرۋ ءۇشىن جاسالىپ وتىر. باسقا امالىمىز دا جوق. وتاندىق زاۋىتتاردىڭ ونىمدەرىن تەك وسىلاي قورعاي الامىز. دەمەك، بىزدە ەكى جول بار: وتاندىق نەمەسە شەتەلدىك وندىرۋشىلەردى قولداۋىمىز كەرەك. ءبىز وتاندىق وندىرۋشىلەردى تاڭداپ وتىرمىز»، - دەدى قانات بوزىمبايەۆ.

ءمينيستردىڭ ايتۋىنا قاراعاندا، ۋاقىتشا شەكتەۋدى ەنگىزۋ نارىقتاعى باسەكەلەستىكتى شەكتەپ جاتىر دەگەندى بىلدىرمەيدى.

«شەكتەۋ بىرنەشە ايدان كەيىن الىنىپ تاستالادى. وسى ۋاقىتتىڭ ىشىندە ءبىز ورتالىق ازيا ەلدەرى مەن رەسەيدەگى ارىپتەستەرىمىزبەن جۇمىس ىستەپ، ەكسپورتقا مۇمكىندىكتەر اشۋىمىز كەرەك. ۇكىمەتارالىق كەلىسىم بىرنەشە ايدىڭ ىشىندە جاسالادى، وسىدان كەيىن بۇل ماسەلە وزدىگىمەن شەشىمىن تابادى. بۇل باعاعا مەنىڭ ويىمشا، ەشقانداي اسەر ەتپەيدى. سەبەبى، تولايىم ساۋدا بار. قازاقستانعا رەسەيدەن ەنەتىنى (بەنزين - اۆت.) ىشكى نارىقتاعى باعادان گورى جوعارى ەكەنىن ايتا كەتۋ كەرەك»، - دەيدى بوزىمبايەۆ.

ەسكە سالا كەتسەك، بۇدان بۇرىن قر پارلامەنتى پالاتالارىنىڭ بىرلەسكەن وتىرىسىنان كەيىن ق ر ەنەرگەتيكا ءمينيسترى قانات بوزىمبايەۆ قازاقستان وتاندىق جانار-جاعارماي نارىعىن قورعاۋ شارالارىن ىسكە اسىراتىنىن حابارلاعان بولاتىن. ونىڭ ايتۋىنشا، اي-92 ماركالى بەنزيننىڭ يمپورتىنا ءۇش ايعا شەكتەۋ ەنگىزىلمەك.