فۋتبولدان الەم چەمپيوناتى: ۋرۋگۆاي رەسەيدى ءىرى ەسەپپەن جەڭدى

بۇل ويىندا ۋرۋگۆاي باسىمدىق تانىتىپ، الاڭ يەلەرىن 3:0 ەسەبىمەن جەڭدى، دەپ حابارلايدى قازاقپارات ءتىلشىسى.

قوس قۇراما دا العاشقى ەكى تۋردا جەڭىسكە جەتكەن ەدى. ۋرۋگۆاي قوس كەزدەسۋدە دە جالعىز گولدان ەنگىزدى. الدىمەن ەگيپەتتى، سودان كەيىن ساۋد ارابياسىن 1:0 ەسەبىمەن تىزە بۇكتىردى. ال رەسەي ساۋد ارابياسىن 5:0, ەگيپەتتى 3:1 ەسەبىمەن جەڭىپ، وزدەرىن توپتان شىعا الا ما دەپ ۋايىمداعان جانكۇيەرلەر كوڭىلىن ءبىر دەمدەپ قويعان بولاتىن. سوندىقتان ولار ۋرۋگۆايمەن ويىندا تەك كىمنىڭ مىقتى ەكەنىن دالەلدەۋ ءۇشىن عانا جاسىل الاڭعا شىعۋى قاجەت ەدى. جولداما تاعدىرىن ەرتەرەك شەشىپ قويعاننان كەيىن قۇرامانىڭ باس باپكەرى ستانيسلاۆ چەرچەسوۆ قۇرامدا ءبىرقاتار وزگەرىستەر جاسادى. العاشقى مينۋتتان نەگىزگى قۇرامدا فەدور كۋدرياشوۆ، يگور سمولنيكوۆ، الەكسەي ميرانچۋك شىقتى. بۇدان بۇرىن «رەسەي مەن ۋرۋگۆاي توپتىڭ مىقتىسىن انىقتايدى» دەگەن تاقىرىپتا ماقالا ۇسىنعان ەدىك.

كەزدەسۋ بىردەن-اق شابۋىلمەن باستالدى. ۋرۋگۆايلىقتار 2-مينۋتتا الاڭنىڭ ورتالىق شەبىنەن شابۋىلعا كوشتى. ۆەسينو فالەرو شامامەن 27 مەتردەي جەردەن قاقپاعا سوققى باعىتتاعان ەدى. ول قاقپا باعاناسىنان ءبىرشاما قاشىق كەتتى. بۇدان كەيىن دە وڭتۇستىك امەريكا قۇرلىعىنىڭ وكىلدەرى جاسىل الاڭ تورىندە باسىمدىعىن بايقاتىپ تۇردى. ويىننىڭ 7-مينۋتىندا ورىستار دا شابۋىلعا شىقتى. قورعاۋشى يليا كۋتەپوۆ شابۋىلشى ارتەم دزيۋباعا الىستان ادەمى پاس بەردى. دەگەنمەن ارتەم دزيۋبانىڭ ءىلىپ اكەتۋىنە ۋرۋگۆايلىق قورعاۋشىلار كەدەرگى كەلتىردى. ۋرۋگۆاي شابۋىلشىسى لۋيس سۋارەس 10-مينۋتتا ءوزىنىڭ مۇمكىندىگىن گولعا اينالدىردى. سول ساتتە ايىپ دوبىن ورىنداعان لۋيس سۋارەستىڭ تەپكەن دوبىنا رەسەيلىك قاقپاشى يگور اكينفەيەۆ ەشقانداي امال قولدانا العان جوق.

ارادا ەكى مينۋتتاي وتكەندە رەسەيدىڭ ەسەپتى تەڭەستىرەتىن مۇمكىندىگى بولدى. ارتەم دزيۋبا قارسىلاستار قاقپاسى ماڭىندا ارىپتەسى دەنيا چەرىشيەۆقا ادەمى پاس بەرگەن ەدى. چەرىشيەۆ ونى قاقپاعا باعىتتاعانمەن، ۋرۋگۆايلىق قاقپاشى فەرناندو مۋسلەرا ونى سىرتقا شاعىرىپ ۇلگەردى. بۇدان كەيىن قوس قۇراما اراسىندا گول سوعاتىن بىرنەشە مۇمكىندىكتەر كەزدەستى. 23-مينۋتتا ءوز الاڭىندا دەنيس چەرىشيەۆ قاقپاسىنا گول سوعىپ الدى. ال ءبىرىنشى كەزەڭنىڭ 36-مينۋتىندا ءتارتىپ بۇزىپ، رەسەيلىك قورعاۋشى يگور سمولنيكوۆ ەكىنشى مارتە سارى قاعاز الدى. وسىنىڭ ناتيجەسىندە سەنەگالدىق تورەشى مالانگ دەديۋ وعان قىزىل قاعاز كورسەتىپ، جاسىل الاڭنان قۋدى. وسىلايشا 0:2 ەسەبىمەن جەڭىلىپ جاتقان رەسەيلىكتەر ەندى 1 ويىنشىمەن عانا قالدى.

توقسان مينۋت تۇگەسىلەر تۇستا ەديسون كاۆاني تاعى ءبىر گول سوقتى. ەسەپ 3:0. ا توبىندا ءبىرىنشى ورىن ۋرۋگۆاي قۇراماسىنا بۇيىردى. ول ەندى ۆ توبىندا ەكىنشى ورىن العان قۇرامامەن 30- ماۋسىمدا كەزدەسەدى.

ەكىنشى كەزەڭدە قوس قۇراما بىرنەشە قاۋىپتى ساتتەردى ۇيىمداستىردى. ارينە، ۋرۋگۆاي قۇراماسىنىڭ باسىمدىعى اڭعارىلدى. بۇل توپتاعى ساۋد ارابياسى مەن ەگيپەت اراسىنداعى كەزدەسۋدە 2:1 ەسەبى تىركەلدى. ءۇشىنشى ورىن ساۋد ارابياسىنا بۇيىرسا، ەگيپەت ءتورتىنشى ورىندى مىسە تۇتتى.