ەردوعان تۇركياداعى سايلاۋ ناتيجەسى بويىنشا مالىمدەمە جاسادى

جوعارعى سايلاۋ كوميسسياسىنىڭ باسشىسى سادي گيۋۆەن رەجەپ تايىپ ەردوعان پرەزيدەنت سايلاۋىندا ابسوليۋتتى كوپشىلىك داۋىسىن جيناعانىن جاريا ەتتى.

ەردوعاننىڭ ايتۋىنشا، سايلاۋ كۇنگى قاۋىپسىزدىك پەن ەركىندىكتىڭ كورىنىسى - تۇرىك دەموكراتياسى جەتىستىگىنىڭ كورسەتكىشى.

«سايلاۋعا كەلۋشىلەر سانى 90 پايىزعا جەتىپ، الەمنىڭ كوپتەگەن ەلدەرىنە ۇلگى كورسەتتىك. ەڭ باستىسى تۇركيانىڭ بارلىق جەرىندە سايلاۋدى ۇيىمداستىرۋدىڭ جوعارى دەڭگەيدە بولعانىنا كوڭىلىمىز تولادى»، - دەدى تۇرىك كوشباسشىسى.

پرەزيدەنت 24- ماۋسىمداعى سايلاۋ تۇركيانىڭ بۇدان ارى قارايعى جەتىستىكتەرىنىڭ كەپىلى بولادى دەگەن ءۇمىت ءبىلدىردى.

ەردوعان وتانداستارىن ۇلت بولاشاعى ءۇشىن بىرىگۋگە شاقىردى. «سايلاۋ الدى كەزەڭدەگى بولعان بارلىق وكپە-رەنىشتى، كەلىسپەۋشىلىك پەن ۇرىس-كەرىستى ارتتا قالدىرۋ كەرەك. ەلىمىزدىڭ بولاشاعى ءۇشىن كۇش-جىگەرىمىزدى ورتاقتاستىرار كەز كەلدى»، - دەدى مەملەكەت باسشىسى.

پرەزيدەنت سايلاۋ ۇدەرىسى مەن داۋىس بەرۋ ناتيجەلەرىن سىناۋدان باس تارتۋعا ۇندەدى. «ەشكىم ءوزىنىڭ ساتسىزدىكتەرىن جاسىرۋ ءۇشىن سايلاۋ ۇدەرىسىنە كولەڭكە تۇسىرمەۋى ءتيىس»، - دەدى ەردوعان.

پرەزيدەنت تۇركيا بيلىگى ەلدى دامىتۋدىڭ 2023-جىلعا دەيىنگى تۇجىرىمداماسىندا كورسەتىلگەن ماقساتتارعا جەتۋگە تولىقتاي ءازىر ەكەندىگىن اتاپ ءوتتى.

تۇركيادا قالا كوشەلەرىندە رەجەپ تايىپ ەردوعاننىڭ جانە ول جەتەكشىلىك ەتەتىن ادىلەت جانە دامۋ پارتياسىنىڭ جەڭىسىن مەرەكەلەۋدى باستادى.