استانالىقتار العاش رەت ۇلتتىق دومبىرا كۇنىن اتاپ وتپەك

استانا. قازاقپارات - ەلوردادا ۇلتتىق دومبىرا كۇنىن مەرەكەلەۋ جوسپارىنا ارنالعان باسپا ءسوز ءماسليحاتى ءوتتى، دەپ حابارلايدى استانا اكىمدىگىنىڭ رەسمي سايتى.

باسپا ءسوز ماسليحاتىندا ۇلتتىق دومبىرا كۇنىنىڭ قۇرمەتىنە استانادا 1- شىلدەدە حالىقتىق سەرۋەننىڭ وتەتىنى بەلگىلى بولدى. استانا قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆ ءمالىم ەتكەندەي، اۋقىمدى شاراعا كەلۋشىلەر قازاقتىڭ ۇلتتىق اسپاپتارى مۋزەيىنىڭ قوناعى بولماق.

«دومبىرانىڭ كۇمىستەي سىڭعىرلاعان ءۇنى توگىلىپ تۇراتىن مۇنداي اۋقىمدى شارا ەلوردادا بۇرىن-سوڭدى بولماعان. حالىقتىق سەرۋەن 1- شىلدەدە «قازاق ەلى» مونۋمەنتىنىڭ الدىنداعى الاڭدا وتەدى. مۇندا كيىز ۇيلەر تىگىلىپ، قازاق ۇلتتىق اسپاپتارىنىڭ مۋزەيى جۇمىس ىستەيدى. قوناقتار قۇرمانعازى، دينا نۇرپەيىسوۆا، احمەت جۇبانوۆ سياقتى ۇلى تۇلعالار، مۋزىكانتتار ويناعان دومبىرالاردى ءوز كوزىمەن كورەدى. كەلۋشىلەر نازارىنا كيىز ۇيلەردىڭ ىشىندە قازاق حالقىنىڭ باسقا دا ۇلتتىق اسپاپتارىنىڭ ءتۇر-ءتۇرى قويىلىپ، دومبىرا جاساۋ بارىسى كورسەتىلەتىن بولادى. مۋزىكانتتار حالىق شىعارمالارىن ورىندايدى، ورتەكە ونەرىن كورسەتەدى»، - دەدى بولات ماجاعۇلوۆ.

مەرەكەنىڭ كوركىن ەلىمىزدىڭ مىڭداعان مۋزىكانت- دومبىراشىسىنىڭ قاتىسۋىمەن وتەتىن «دومبىرا -اسىل مۇرا» كونسەرتى كەلتىرمەك.

ساحنا تورىندە ايگۇل ۇلكەنبايەۆا، نۇرجان تاجىكەنوۆ، اسىلبەك ەڭسەپوۆ، «ارت دومبىرا» تريوسى، مۋزارت، سەكەن تۇرىسبەك، بەكبولات تىلەۋحان، ايتقالى جايىموۆ، ايتجان توقتاعان اعالارىمىز ونەر كورسەتەدى. مۇنىمەن قوسا، كورەرمەن قاۋىم قۇرمانعازى اتىنداعى قازاق مەملەكەتتىك ۇلتتىق اسپاپتار وركەسترى، «وتىرار سازى» ۇلتتىق اسپاپتاردىڭ فولكلورلىق-ەتنوگرافيالىق وركەسترى، استانا قالاسىنىڭ مەملەكەتتىك اكادەميالىق فيلارمونياسىنىڭ ۇلتتىق اسپاپتار وركەسترى، تاتتىمبەت اتىنداعى اكادەميالىق ۇلتتىق اسپاپتار وركەسترى جانە اقتاۋ قالاسىنىڭ قازاق ۇلتتىق اسپاپتار وركەسترىنىڭ ونەرىن تاماشالايدى دەپ كۇتىلۋدە.

استانالىقتار العاش رەت ۇلتتىق دومبىرا كۇنىن اتاپ وتپەكايتا كەتەيىك، ۇلتتىق دومبىرا كۇنىنىڭ قۇرمەتىنە وتەتىن سەرۋەندە نيەت بىلدىرگەندەردىڭ بارلىعى ساحناعا شىعىپ، دومبىرادا ويناۋ ونەرىن كورسەتە الادى. نەگىزگى تالاپ: دومبىراشىلار «كوڭىل اشار»، «اداي»، «بالبىراۋىن»، «ەركە سىلقىم»، «سارىارقا» كۇيلەرىن جاتقا ءبىلۋى قاجەت. بۇگىنگە دەيىن مەرەكەلىك كەشكە قاتىسۋعا www.asyldombyra.kz سايتى ارقىلى نيەت بىلدىرگەندەردىڭ سانى 1300 ادامنان اسادى.

ەستەرىڭىزگە سالا كەتەيىك، قوعامدى ۇلتتىق مادەنيەت پەن بىرەگەيلىكتى ساقتاۋ مەن قايتا جاڭعىرتۋ يدەياسىنىڭ توڭىرەگىندە ودان ءارى توپتاستىرۋ ماقساتىندا 14- ماۋسىمدا مەملەكەت باسشىسى نۇرسۇلتان نازاربايەۆ شىلدەنىڭ ءبىرىنشى جەكسەنبىسىن ۇلتتىق دومبىرا كۇنى ەتىپ بەلگىلەۋ تۋرالى جارلىققا قول قويعان بولاتىن.