12:02, 17 - ماۋسىم 2018 | GMT +6
قازاقستاندىق احمەدوۆ مەكسيكالىق بوكسشىنى نوكاۋتپەن جەڭدى
استانا. قازاقپارات - قازاقستاندىق بوكسشى سادريددين احمەدوۆ كانادادا وتكەن كاسىپقوي بوكس كەشىندە مەكسيكا وكىلىن نوكاۋتپەن جەڭدى، دەپ حابارلايدى «SPORTINFORM» س ا ا.
ءبىرىنشى ورتا سالماق وكىلدەرى سادريددين احمەدوۆ پەن گۋستاۆو گاريباي (13-10-2، 5 ك و) اراسىنداعى جەكپە-جەك التى راۋندقا شاقتالعان بولاتىن. الايدا بەسىنشى راۋندتاعى احمەدوۆتىڭ بەت قاراتپاعان ەكپىنىنە مەكسيكالىق بوكسشى قاۋقارسىز بولىپ شىقتى - نوكاۋتقا ءتۇستى.
قازاقستاندىق پروسپەكت وسىمەن ءۇشىنشى جەڭىسىنە قول جەتكىزدى. ونىڭ بارلىعىندا قارسىلاستارىن نوكاۋتقا جىبەرگەن. ال گۋستاۆو گاريباي ون ءبىرىنشى رەت جەڭىلدى.