يزرايل كۇتپەگەن جەردەن ءوزىنىڭ قاس جاۋىنا كومەكتەسپەك نيەتىن تانىتتى
استانا. قازاقپارات - يزرايل كۇتپەگەن جەردەن ءوزىنىڭ قاس جاۋى يرانعا قول ۇشىن سوزاتىن بولدى. ۇكىمەت باسشىسى بەنيامين نەتانياحۋ سۋ ۇنەمدەۋدەگى زاماناۋي جەتىستىكتەرىن يرانمەن بولىسۋگە دايىن ەكەنىن ءبىلدىردى. نەلىكتەن؟
بەنيامين نەتانياحۋ بۇل ۇسىنىسىن بەينەۇندەۋ تۇرىندە جاريالادى. ەكى ەل بيلىگى اراسىندا كوپتەن بەرى بايلانىس جوق بولعاندىقتان، وسى ۇندەۋىن رەسمي تەگەرانعا ەمەس، قاراپايىم حالىققا جولداعان.
بەنيامين نەتانياحۋ، يزرايل پرەمەر- ءمينيسترى:
- مەن بۇگىن يراندىقتارعا سۋعا قاتىستى تەڭدەسسىز ۇسىنىس جاساماقپىن. يران حالقى وزدەرىن تىرشىلىك نارىنەن قاعىپ وتىرعان قاتال بيلىكتەن جاپا شەگىپ وتىر. سول سەبەپتى يزرايل يراندىقتارعا كومەكتەسكىسى كەلەدى.
نەتانياحۋدىڭ ايتۋىنشا، ۇزاق ۋاقىت قۋاڭشىلىققا ۇشىراعان يراندا سۋ جەتىسپەگەندىكتەن كەيبىر ەلدى مەكەندەردى كوشىرتىپ جاتىر. ال ەل ەكونوميكاسىنىڭ اۋىر جاعدايىن ەسكەرسەك، بۇل وزەكتى ماسەلەنىڭ جاقىن ارادا شەشىلەتىن ءتۇرى جوق. وسى ورايدا ەۆرەي مەملەكەتىنىڭ وزىق تەحنولوگيالارى پايداعا اسار ەدى. الايدا يزرايلدىقتارعا يرانعا اتتاپ باسۋعا تىيىم سالىنعان. بىلىمدەرىمەن بولىسەتىندەي ەكى ەل اراسىندا قاتىناس تا جوق. الايدا پرەمەر قاراپايىم يراندىقتارعا كومەكتەسۋدىڭ امالىن تاپقان كورىنەدى.
بەنيامين نەتانياحۋ، يزرايل پرەمەر- ءمينيسترى:
- ءبىز يراندىقتارعا سۋدى قالاي ۇنەمدەۋ كەرەكتىگىن تۇسىندىرەتىن پارسى تىلىندەگى سايت اشپاقپىز. شارۋالارعا ەگىندى قالاي ساقتاۋ كەرەكتىگىن كورسەتەمىز. يران بيلىگى بىزگە ءولىم تىلەسە دە، ءبىز حالقىنا دوستىق پەيىلمەن قارايمىز.
يزرايل بۇرىننان- اق وسى ماسەلەسىن شەشىپ العان. بۇل ەلدە سۋ كوزى دەرلىك جوق بولعانىمەن، ءوز حالقىن تولىقتاي قامتاماسىز ەتىپ، كورشىلەس يوردانيا جانە مىسىرمەن دە ءبولىسىپ وتىر. يزرايلدە تامشىلاتىپ سۋارۋدان باستاپ اعىن سۋلاردى ءجۇز پايىز تازارتۋعا دەيىنگى وزىق تەحنولوگيالار بار. يرانعا كومەكتەسۋ ۇسىنىسى ويعا قونىمسىز بولعانىمەن، پرەمەر- ءمينيستردىڭ Facebook الەۋمەتتىك جەلىسىندەگى جازباسىنا حالىق سۇيسىنگەن پىكىرلەر قالدىرعان.
www.24.kz
